Балтач бистәсендәге “Балтач” спорткомплексында балалар бакчаларына йөрүче сабыйлар арасында спорт фестивале узды

Балтач җирлегендә инде менә җиденче мәртәбә үткәрелүче спорт фестивале елдан-ел камилләшә бара. Быел биредә уналты балалар бакчасы катнашса, киләсе елларда аларны тагын да арттыруны күздә тоталар.

Балтач бистәсендә урнашкан балалар бакчасының дүртесе һәм авыл –зоналар буенча ясле-бакчалардан килгән сабыйлар ярышларның тантаналы өлешен дә күрде, гимннар да тыңлады, ярыш алды гимнастикасын да эшләде. Барысы да зурларча. Ярышканда көч биреп торырга район яшьләр бүлеге мөдире Рөстәм Заһидуллин да килгән, мәгариф идарәсе җитәкчесе Алия Зәкиева да биредә. Иң башта командаларга изге теләкләрен җиткерсәләр, ахырдан җиңгән командаларны котлап, бүләкләр тапшырдылар.

– Әлеге ярышларның фестиваль югарылыгында массакүләм үтүе яшь организмны сәламәт яшәү рәвешенә өйрәтүдән, спортка мәхәббәт уятудан гыйбарәт, – ди Рөстәм Заһидуллин.– Шушындый бәйгеләрдә алар район җирлегендә спортны гына популярлаштырып калмый, үзара дуслык мөнәсәбәтләре дә булдыра. Ә татулык төшенчәсе нәниләр өчен генә түгел, балалар бакчасы колективлары өчен дә мөһим.