5б сыйныфы укучылары классташлары вакытлыча өйдә укырга мәҗбүр булган Сәләхов Раилләр гаиләсендә еш булалар. Укучылар Раилгә класс, мәктәп яңалыкларын җиткерәләр, төрле хәлләр турында фикер алышалар. Гомумән, классташлар вакытны күңелле үткәрәләр.

1 класс укучысы Марданова Раида Арчада узган шахмат ярышында- 3 урын, Салавычта Фаот Юсупов истәлегенә узган район ярышында 1 урын алды. Абыйсы, 4б классы укучысы,  Марданов Раил, 2 урынга лаек булды. Уңышларыгыз белән!

  4-10 январьда Владимир өлкәсенең Судогда шәһәрендә өч тапкыр Олимпия чемпионы,10 тапкыр дөнья чемпионы булган А.П. Рагулин истәлегенә узган 22 нче Бөтенроссия “Алтын алка” хоккей турнирында Балтач район хоккей командасы 3 урынга лаек булды. Бу команда составында безнең мәктәп егетләре дә бар иде. Алар 7 сыйныф укучылары: Салихзянов Нияз, Хакимзянов Ислам, Каримов Салават, Садиков Кәрим, Юсупов Раил, Ахкямов Рамазан. Тренерлары Садыйков Р. М., Нурсәитов Ф. Федерация җитәкчесе Шакиров И. Н. Егетләр әфәрин!Яңа җиңүләр сезгә!

11 гыйнварда – иң әдәпле бәйрәмнәрнең берсе -Халыкара “Рәхмәт“ көне бәйрәм итеп үтелә. Бу көнне мәктәптә “Рәхмәт” акциясе оештырылды. Башлангыч сыйныф укучылары аны үзләре ясаган рәсемнәрдә чагылдырдылар.

Укучыларыбыз кышкы салкыннарда кышлаучы кошларга кешеләр ярдәме кирәк икәнен беләләр.Шуңа күрә кышкы каникул алдыннан кошларны кайгыртып, аларга җим салу оештырылды. Аны беренче  класс укучылары башлап җибәрде. Башка класслар да аларга кушылсын иде.Әле кыш озын һәм салкын. Иң әһәмиятлесе җим салырга онытмыйк,  җимлеккә кар үтеп керерлек булмасын. Иң әйбәт ризык: көнбагыш, киндер орлыгы. Кавын, карбыз, кабак орлыклары да ярый. Песнәкләрнең иң яраткан ризыгы- туң май, ит, сыр.Аларны тимер чыбык белән беркетеп куярга кирәк.

Кышкы каникулда Балтач  районында  һәр төрле спорт чаралары үткәрелде. Шуларның берсе 2006-2007 елларда туган яшүсмерләр арасында волейбол буенча узган район беренчелегенә ярышлар. Бу ярышта безнең укучылар командасы 3 урынга чыкты. Тренерлары:Гатауллин Тимур Фәргать улы. Котлыйбыз!

26-27 декабрь- мәктәп укучылары өчен Яңа ел бәйрәмнәре көннәре.

26 декабрьдә 7-8 класс укучылары өчен “Яңа ел белән! “ белән бәйрәме  үтте. 9-11 класс укучылары Кыш бабайлы, Кар кызлы 80-90 еллар стилендә дискәтүк оештырдылар.

27 декабрьдә 1-4 класслар, 5-6 класслар өчен “Яңа ел” могҗизалары” театралләштерелгән тамаша узды.

Яңа елга күп калмады.Әйдәгез бер-беребезгә сәламәтлек, уңышлар, иминлек, тыныч күк йөзе телик!

15 декабрьдән 25 декабрьга кадәр “Яңа елга мәктәпне бизик!” акциясе үтте.

Яңа ел - балалар өчен иң теләгән, иң яраткан бәйрәм. Һәркем аны түземсезлек белән көтә. Яңа ел сулышы сихри көчкә ия, уңай тирәлек тудыра, хыялларга урын калдыра.

          Укучылар зур тырышлык белән мәктәп кабинетларын, коридорларны һәм тәрәзәләрне бизәү белән шөгыльләнделәр. Мәктәп чыршысы да бизәлде, фотозона эшләнде. Мәктәп алдындагы биек чыршы да “яңа ел киемен” киде. Ишек алдында әкият геройлары калкып чыкты.

5 декабрьдан 8 январьга кадәр “Яңа ел тәрәзәләре” Бөтенроссия акциясе бара. Бу флешмобта безнең укучылар ел саен теләп катнашалар. Балаларның күзләрен иркәләп, мәктәп тәрәзәләрендә матур кышкы бизәкләрдән торган күренешләр барлыкка килә. Аннан соң бу флешмоб укучылар яшәгән йортларга да тарала.

23 декабрьда сәнгать юнәлешендәге өстәмә белем бирү түгәрәкләренең яртыеллык иҗат отчеты булды.

“Балачаклы Яңа ел!” концертында «Цветная бусинка» (Төсле бөртек) (ЦВР, җит. Ахмадуллина Г.Р.), «Ритмы танца » (Бию ритмнары)  (ЦВР, җит. Мухаммадиева С.Г.), «Конферанс» (ЦВР, җит.. Юсупова Г.А.), «Веселый английский» (Күңелле инглиз теле) (мәктәп, җит. Шафигуллина Л.Р.), «Татарча җырлыйбыз» (мәктәп, җит. Каримова Ф.Р.) түгәрәкләре һәм бию төркемнәре «Reverans», «Браво» (сәнгать мәктәбе, җит. Хабибуллина Н.Ф.) катнаштылар. Тамашачылар искиткеч матур җырлар һәм биюләр һәм спектакль карадылар.