Татарстан Республикасында «Иң яхшы билингваль балалар бакчасы» грантын алуга конкурста сайлап алуның икенче этабы дәвам итә. Бүген комиссия Балтач бистәсенең 1 нче балалар бакчасында булды һәм балаларга билингваль белем бирү өлкәсендә учреждение эшен бәяләде. Комиссия составында Татарстан республикасының мәгариф һәм фән министрлыгының әйдәп баручы киңәшчесе Гәләвиева Чулпан Хәйдәр кызы, Казан шәһәренең Яңа Савин районы 405 нче балалар бакчасының өлкән тәрбиячесе Хәкимова Сиринә Ибраһим кызы һәм Авиатөзелеш районының 308 нче балалар бакчасының мөдире Бәдертдинова Гүзәл Рәшит кызы иде.

Балалар бакчасы эшчәнлеген оештыруга якын килүнең системалылыгы, балалар белән эшләү формаларының төрлелеге һәм оригинальлеге, педагоглар һәм балалар эшенең нәтиҗәлелеге, педагогик коллективның методик активлыгы, педагогларның авторлык программалары һәм методик эшләнмәләре булу, шулай ук ата-аналар белән балаларның билингваль белем алу буенча эш формаларының төрлелеге кебек аспектлар бәяләнде.

Комиссия балалар бакчасының билингваль белем бирү өлкәсендәге уңышлы эшен билгеләп үтте.

Ә без үз чиратыбызда уңай нәтиҗә көтеп калабыз.