Бүген гриппка каршы торыр өчен саклану чаралары турында класс сәгатьләрендә  аңлатылды.Күбрәк витаминнар эчәргә, саф һавада йөрергә,кеше күп булган урыннарда маска киеп йөрергә кирәклеге әйтелде.

      Бүген 6 нчы класс укучылары белән “ Интернет челтәрендә - куркынычсызлык” дигән темага класс сәгате уздырылды. Укучылар заманча мәгълүмати мохиттә җаваплылык, куркынычсызлык кагыйдәләре, саклану чаралары белән таныштылар. Социаль челтәрләрдә дөрес аралашырга, виртуаль дусларга тиеш булмаган  сүзләр язмаска,   фото- мәгълүмат  куярга ярамаганын аңладылар.

Бүген,  21 нче январь көнне, классларда Интернет челтәрендә куркынычсызлык буенча тәрбия сәгатьләре үткәрелде. Укучылар  Интернетта ничек үз компьютерынны сакларга,  шәхси информацияне  урнаштыру куркынычы,  башка кулланучылар белән үзара мөгамәлә турында белемнәрне искә төшерделәр.  

Мәктәбебездә "Тимурчылык отряды" актив эш алып бара. Бүген 7 класс укучылары үзләре шефлык иткән тыл ветераны, авылыбызның иң өлкән кешесе Хәсәншина Фатыйма апага бардылар. Өй тирәсен кардан арындырдылар. Фатыйма апа укучыларга зур рәхмәтләрен җиткерде.

Безнең мәктәп укучылары буш вакытларын файдалы итеп куллана беләләр.

Мәктәбебез укучылары кышкы спорт төре чаңгы буенча ГТО нормаларын тапшырдылар.

Бүген 5 классларда "Юл йөрү кагыйдәләрен өйрәник" дигән темага әңгәмә уздырылды. Максат: Юлда йөрү кагыйдәләре турындагы белемнәрне ныгыту; уен аша балаларның фикерләү сәләтләрен, игътибарлылыкларын үстерү; урамда йөргәндә игътибарлы булырга, юл йөрү кагыйдәләрен үтәргә өйрәтү,  юл йөрү кагыйдәләрен тагын да тирәнрәк өйрәнергә кызыксыну уяту.

Олы юлларда кагыйдәләрне төгәл үтик. “Ашыккан җитмәс, боерган җитәр”, ди халык. Күпме генә ашыксаң да, вакытны куып тотып булмый. Юлларда уяу, сак булыйк. Якыннарыбыз безнең өчен тыныч булсыннар. Иминлегебез үзебезнең кулларда!

                                 Ашыгулар һәлакәткә илтә” –

                                 Дөреслек бар моңлы җырларда.

                                 Шул сүзләрне истән чыгармыйча

                                 Йөрик әле  олы юлларда.

Бүген мәктәбебездә юлда йөрү кагыйдәләрен искә тошерү максатыннан класс сәгатьләре үткәрелде.

Уку елының икенче яртысы башланып китте. Тугызынчы класс укучылары өчен бу яртыеллык бигрәк тә җаваплы - алда имтиханнар көтә. Барлыгы 4 имтихан бирергә кирәк булачак. Ныклап әзерләнергә, калган вакытны дөрес бүләргә өйрәнергә кирәк. 9 класста узган класс сәгатендә сөйләшү шул хакта булды.

Буген 2 һәм 4 нче классларда "Тимер юлларда сак булыйк" дигән темага класс сәгате үткәрелде, видеороликлар каралды. Хәрәкәт иминлеге ягыннан, тимер юл кичүләре иң куркыныч урыннарның берсе булып тора. Тимер юлларда килеп чыккан юл-транспорт фаҗигаләре, кагыйдә буларак, бик начар тәмамлана, шул сәбәпле аеруча игътибарлы булырга кирәк.