Бүген башлангыч класс укучылары “Мулла чишмәсе”нә сәяхәткә барып кайттылар. Әлеге урынга алар бик теләп йөриләр, тәмле салкын суыннан авыз итәләр. Кушлавыч авылы тарихы турындагы язмалаларны укыганда, бөек шагыйребез Габдулла Тукай, туганнары һәм аның исеме белән бәйле билгеле шәхесләр бу чишмә суыннан авыз иткән.
Г.Тукайның җиде буын бабалары Кушлавыч авылы мәчетендә мулла вазыйфасын башкарган һәм үз нигезләренә якын чишмәне карап, чистартып торган. Аеруча, Габдулланың бабасы Мөхәммәтгалим мулла чишмәне төзек итү өчен күп көч куйган. Авыл халкы аны хөрмәт иткән һәм бу чыганакны “Мулла чишмәсе” дип атаган. Габдулла Тукайның әнисе Бибимәмдүдә нәни Габдуллаҗанны әлеге бик күп догалар укылган чишмә суы белән коендырган.
Г.Тукайның әнисе ягыннан булган Зиннәтулла бабасы да Кушлавыч авылы мәчетенә мәэзин итеп билгеләнгәч, шушы чишмәне карап тора һәм суыннан файдалана. 1894 нче елда Җаек шәһәренә әтисненең туганнары тәрбиясенә китәр алдыннан һәм 1907 нче елда солдатка каралырга кайткач, Габдулла Тукай бабасы хөрмәтенә аталган “Мулла чишмә”се суын эчеп, туган ягы белән саубуллашып китә.
2018 нче елның 26 апрелендә яңартылган чишмәне ачу тантанасы булды. Чишмәне төзекләндерүдә Татарстан Республикасы Дәүләт Советы депутаты, Г.Тукай исемендәге Дәүләт премиясе лауреаты, “Таттелеком” оешмасының генераль директоры Лотфулла Шәфигуллин үз өлешен кертте.
Бүгенге көндә авыл халкы әлеге чишмә суын бик ярата, аны тәртиптә тота.