11 сентябрьдә Бөтенроссия аеклык көне билгеләп үтелә. Аның максаты - хәмернең зыяны хакында кабат искә төшерү, алкоголизмга җәмәгатьчелек игътибарын җәлеп итү.
    Алкогольгә бәйлелек бүгенге җәмгыятьнең иң зур проблемаларының берсе. Ул халыкны киләчәгеннән мәхрүм итә.
    Алкоголь турыдан-туры күзәнәкләргә үтеп кереп, кеше организмының барлык әгъзаларын һәм тукымаларын җимерә башлый. Эчкечеләр күбесенчә инфаркт, инсульт, бавыр церрозы, нерв системасы какшау чирләреннән вафат була.
    Сәрхүшләрнең гаиләләренә дә кыен, эчкән кеше янында җан тынычлыгы югала. Шушы упкынга төшмәс өчен, алкогольдән тыелу зарур.
    Алкоголизм киләчәк буыннарга да тискәре йогынты ясый. Аеруча яшь буында спиртлы эчемлекләргә карата тискәре караш тәрбияләү, сәламәт яшәү рәвешен пропагандалау зарур. Шушы максаттан чыгып, без укучыларыбыз белән кичә “Тормышка аек акыл белән кара!” дигән темага түгәрәк өстәл оештырдык. Алкогольнең кешелеккә салган зыяны турында фикерләр алыштык, презентация карадык.