Гимназиябездә "Россиядә патриотизм" темасы буенча метапредмет ункөнлеге башланып китте. Ункөнлек кысаларында 6нчы А сыйныфында биология фәне буенча ачык дәрес үтте, дәреснең темасы: "үсемлекләрнең үрчү юллары". Югары квалификацияле биология укытучысы Фаракшина Лилия Виталий кызы уздырган дәрес яңа дәүләт стандартлары таләпләренә тулысынча туры килә, укучылар зур кызыксыну белән яңа теманы үзләштерделәр, сыйныфта фәнне төрле дәрәҗәдә үзләштерүче укучылар булса да, әлеге дәрес аларның зур активлыгы белән узды. Дәрестә катнашкан коллегалар укытучы һәм укучылар эшчәнлеген югары бәяләделәр.

15 нче февраль – татар халкының бөек улы, герой-шагыйрь Муса Җәлилнең туган көне. Бүген илебезнең төрле почмакларында аны искә алу кичәләре булып үтте. Нәби Дәүли исемендәге гимназиясендә дә бу уңайдан күләмле чаралар оештырылды. Җәлил иҗатына багышланган сыйныф сәгатьләре үтте. Гимназиянең актлар залында 5-6 нчы сыйныф укучылары катнашында “Гомерем минем моңлы бер җыр иде” дип аталган кичә Җәлилнең тормыш һәм иҗат юлына багышланган фильм карау белән башланды. Укучылар чараны алып баручы татар теле һәм әдәбияты укытучысы Сафина Лилия Гавас кызы белән Җәлилнең иҗаты, тормыш юлына кыскача күзәтү ясадылар. Яттан шагыйрьнең сугышка чаклы һәм тоткынлыкта язган шигырьләрен сөйләделәр. Язмада Х. Бигичев башкаруында Җәлил сүзләренә иҗат ителгән “Җырларым” исемле җырын тыңладылар. 5 нче а сыйныфы укучылары шагыйрь сүзләренә язылган “Карак песи” җырын башкардылар. Кичәнең 6 нчы б сыйныфы укучылары башкаруында “Салют сиңа, Муса Җәлил” җыры белән тәмамлануы Җәлил исеменең мәңгелек булуын искәртте. Чара "Россиядә патриотизм" темасы белән узучы метапредмет атналыгы кысаларында узды.