Бу хакта мәгариф хезмәткәрләренең август киңәшмәсендә район башлыгы Ленар Зарипов искәртте. Бу бер тапкыр бирелә торган ярдәм. Ягъни бер елга 100 мең сум күләмендә түләнәчәк. Әлеге акчалар бүленеп бирелми. Ел да тулысы белән, бер тапкыр түләнә. Әлбәттә, төп шартларның берсе - яшь мөгаллимнең 5 ел дәвамында районда эшләве. Шуны да искәртеп китү урынлыдыр, бу яңалык максатчан программа буенча укыган (целевой) яшь белгечләргә кагылмый. Яңа уку елын республиканың мәгариф системасы иң кискен мәсьәлә: кадрлар кытлыгы белән каршы алды. Белем йортларына 2 мең укытучы җитми. Бу, бөтен яшь белгечләр дә шәһәрдә кала, авыл җирлегенә кайтмый дигән сүз түгел. Төп кытлык нәкъ шәһәр җирлегендә.