9 нчы февраль көнне мәктәбебездә Гаилә елына рәсми рәвештә старт бирелде. "Тәрбия гаиләдән башлана" исеме астында оештырылган ата-аналар җыелышы "Алдынгылар" хәрәкәтенең район бүлекчәсе җитәкчесе Марданов Айгиз Хәлил улының чыгышы белән башланып китте. Директорның тәрбия эшләре буенча урынбасары Гайсина Лилия Фәнил кызы  Россиядә Гаилә елы, Татарстан Республикасында Фәнни-технологик үсеш елы уңаеннан планлаштырылган һәм тормышка ашырылган эшләр, нәтиҗәләр белән таныштырды. "Гаилә елы кысаларында, республика күләмендә  ата-аналар комитетлары арасында оештырылып килүче "Тату сыйныф серләре" бәйгесенең муниципаль этабында мәктәп командасы 3 нче урынга лаек булды. Актив гаиләләр шулай ук #команда_страны акциясенә теләп кушылдылар, " диде ул үз чыгышында. Мәктәп директоры Хаҗиев Алмаз Сәяф улы фән олимпиадаларының район һәм республика этабында уңышлы чыгыш ясаган укучыларның хезмәтен югары бәяләде."Йолдызлык-2024" фестиваленә әзерлек барышында ата-аналар тарафыннан күрсәтелгән ярдәм өчен рәхмәт сүзләрен җиткерде. Чара укучылар тарафыннан әзерләнгән концерт белән тәмамланды.