11 нче октябрь көнне Казанда көзге ярминкә үтте. Хәзер авыл халкы мул яши, үз ихтыяҗыннан арткан яшелчә, җиләк-җимешен, кул эшләрен (бәйләгән, теккән, чиккән әйберләр), каз-үрдәк итләрен, умарта балларын, кыскасы, акчага әйләндереп булырдай әйберләрен бик теләп ярминкәдә сатуга куя. Әлеге ярминкәдә актанышлылар үз бурычларын җиренә җиткереп, сатып алучыларга ошарлык итеп үтәделәр. 

Безнең халыкта элек –электән өлкәннәргә хөрмәт һәм ярдәм итү изге эш дип саналган. Тәрбия эшендә дә без моны үзебезнең  максатыбыз һәм бурычыбыз итеп саныйбыз.Балаларда шәфкатьлелек, кешелеклелек, миһербанлылык сыйфатлары булдырырга тырышабыз. Шул максаттан һәр класска ярдәмгә мохтаҗ өлкәннәребез бүлеп бирелде. Укучылар аларның хәлләрен белеп, ярдәм итеп торалар.

11 нче октябрь көнне Казанда үзләренең мәктәпяны тәҗрибә участокларында үстерелгән яшелчә, җиләк - җимешләре, технология дәресләрендә укучылар белән эшләгән көнкүреш кирәк-яраклары белән ярминкәдә катнашучы мәктәпләр арасында Киров мәктәбе дә бар. 

3 октябрь көнне Киров авыл клубында "Өлкәннәр ункөнлеге" уңаеннан концерт оештырылды. Бу концертта "Тамчы" балалар бакчасыннан нәниләребез, мәктәп укучылары,  клуб эшчеләре катнашты. Авыл җирлеге башлыгы Гафуров А. А. авылыбыз өлкәннәрен бәйрәм белән котлады һәм изге теләкләр теләде.  Үз чиратында  барлык өлкәннәр исеменнән Шайхелмарданова Роза апа концертны оештыручыларга һәм катнашучыларга рәхмәтен җиткерде, аларга эшләрендә, укуларында уңышлар теләде.

3 октябрь көнне укытучылар бәйрәме һәм "өлкәннәр ункөнлеге" уңаеннан бүгенге көндә лаеклы ялда булган өлкән укытучыларыбызга, тех хезмәткәрләребезгә чәчәк бәйләме белән бәйрәм пакетлары өләштек.  

Иң зур дини бәйрәмнәребезнең берсе – Корбан гаете уңаеннан барыгызны да бәйрәм белән чын күңелдән тәбрик итәбез.

Олуг бәйрәм бүген бар җиһанда -
Корбан гаете котлы булсын!
Изге эшләр кылган һәр кешегә
Бәхет-сәгадәт насыйп булсын!

Укытучым!

Кирәк чакта җитез дә син, тапкыр да син

Кирәк чакта сабыр да син, батыр да син.

Бик җаваплы, авыр синең хезмәтең дә,

Тиешенчә күрсәң иде хөрмәтен дә.

Хөрмәтле укытучылар! Көчегез төкәнмәвен, эшләү дәрте сүрелмәвен, укучыларыгыз белән үзара аңлашу һәм укытучы һөнәренә тугрылык телибез. Һәрвакытта һәм һәркайда уңышлар юлдаш булсын сезгә.

1 октябрь - өлкәннәр көне уңаеннан үткәрелгән ярминкә белән көзге ярминкәгә старт бирелде. Ярминкә һәр сатып алучының да ихтыяҗын канәгатьләндерерлек бай ассортимент белән узды. 

Мәктәпләр дә үзләре җитештергән продукция белән сатуга чыктылар, яшелчә, җиләк - җимеш, кайнатмалар, камыр ризыклары мулдан иде. 

Район башлыгы Фаил Камаев җитәкчелегендәге делегация һәр сату ноктасында булып, сатучылар белән дә, сатып алучылар белән дә аралашты. Әлеге ярминкәдә безнең мәктәптән дә катнаштылар. 

30 сентябрь көнне "Өлкәннәр ункөнлеге" уңаеннан 1- 11 класслар арасында мәктәптә ярминкә үткәрелде.  Һәр класс бик актив катнашты. Ярминкәдән җыелган акчалар өлкән укытучыларга пакет тутыру өчен тотылачак. 

28 нче сентябрь көнне Актанышта йөгерү ярышы үткәрелде. Әлеге ярышта безнең мәктәп укытучылары һәм укучылары да актив катнашты.