27, 30 нчы май көннәрендә гимназия-интернатта 4, 6 сыйныф укучылары өчен "Science Fair" фән фестивале үтте. Җиңүче балалар дипломнар белән бүләкләнде.

Сайлап алу этабын үтүче укучылар исемлеге

25-29 нчы май көннәрендә гимназия-интернат базасында Актанышның 1 нче, 2 нче һәм гимназия-интернатның 10 нчы сыйныф егетләре өчен хәрби җыеннар үтте.

Шушы көннәрдә сәләтле балалар өчен гимназия-интернат укучылары Егорова Аделина, Хаҗиев Айбулат һәм Әһлетдинова Энҗе Төркия шәһәрләренә сәяхәт кылдылар. Мондый сәяхәтләр Актаныш укучылары өчен матур традициягә әверелеп бара.
Бүген, 22 май көнне чит илдә булып кайткан укучылар район башлыгы Фаил Камаев белән очраштылар. Балалар үзләренең хис-тойгылары белән уртаклаштылар һәм район җитәкчелегенә зур рәхмәтләрен белдерделәр. 

Бүген гимназия-интернатның 24 чыгарылыш укучысы өчен соңгы кыңгырау яңгырады. Укучыларны район мәгариф идарәсе җитәкчесе Ләйсән Нурлыева, гимназия-интернат директоры Артур Галиәхмәтов, сыйныф җитәкчеләре Ләйсән Әминова, Миләүшә Абдуллина, укытучылар һәм ата-аналар котладылар. Һәр елдагыча фән олимпидаларында, спорт ярышларында, сәнгать конкурсларында катнашып килгән укучылар Мактау Грамоталары, дипломнар белән бүләкләнделәр. "Ел укучылары" булып Газизова Сөмбел, Шакирова Ләйлә һәм Шәйхин Айдар аталдылар. 

Әйе, вакыт сиздерми генә үтеп киткән, инде балаларыбыз канат чыгарып үз ояларыннан очып китәргә җыеналар. Балачак инде артта калды. Алда беренче сынаулар - БДИлар көтә. Ни генә булмасын, имтиханнарны уңышлы тапшыруыгызны телибез! Сезгә дөньяның матурлыгын, тормышның асылын, яшәү ямен һәм мәгънәсен аңлап яшәргә язсын. Ак юл сезгә, балалар!

Җырлап торган моңлы кыңгырау ул-
Киләчәкнең кайнар сәламе,
Ак хыяллар сынмас канат булсын
Бәхет язсын тормыш каләме.

Бүген, 21 май көнне Актаныш район мәдәният йортының тантаналар залында фән олимпиадаларында җиңүчеләрне хөрмәтләү чарасы булып узды. Тантанада район башлыгы Фаил Камаев, район Башкарма комитет урынбасары Ландыш Шамсунова, район мәгариф идарәсе җитәкчесе Ләйсән Нурлыева, укучылар, укытучылар, мәгариф хезмәткәрләре катнашты. 2014 - 2015 уку елында район укытучыларының фидакарь хезмәте нәтиҗәсендә республика, бөтенрәсәй, төбәк, халыкара фән олимпиадаларында 36 призлы урын яуланды. Шуларның 19-ы - гимназия-интернатныкы.
Чараның иң тантаналы мизгеле булып, “Гыйлем иясе – 2015” исеменә лаеклы гимназия-интернатның 11 сыйныф укучысы Шәйхин Айдарны котлау булды. 

Кичә, 19 нчы май көнне, Казанда Идел буе дәүләт физик культура, спорт һәм туристлык академиясендә Бөтенроссия укучылар фән олимпиадасы җиңүчеләрен һәм призерларын хөрмәтләү тантанасы булды. Чарада гимназия-интернаттан директор Галиәхмәтов А.К., укытучылардан Хәева-Хәмитҗанова В.Х., Гарипова Р.И., Әһлетдинова Л.Ф., Абдуллина М.М., укучылардан Шәйхин А., Гаязова Л., Закирҗанова Ф., Галиева А. һәм Насертдинова С. катнаштылар.

Кичә гимназия-интернат дирекциясе һәм бер төркем укытучылар Татарстан Республикасы Премьер-министры урынбасары – Татарстан Республикасы мәгариф һәм фән министры Фәттахов Энгель Нәвап улы белән очрашуда булып кайттылар. Очрашуда гимназия-интернатның үсеш перспективалары һ.б. мәсьәләләр каралды. Шулай ук гимназия-интернат делегациясе Казан шәһәренең 2 нче санлы лицей-интернаты һәм 12 нче санлы урта мәктәбе эшчәнлекләре белән танышты.

14 - 16 нчы май көннәрендә Актаныш районының Байсар урманында туристик слет узды. Гуманитар гимназия-интернат командасы гомуми нәтиҗәләр буенча урта мәктәпләр арасында 3 нче урынны яулады. Җитәкчеләре Сибгатуллин Р.Т. һәм Харрасова А.Р.

Районкүләм "Гамил Афзал фестивале" нәтиҗәләре буенча гимназия-интернат укучылары Шәймиева Э. 1 нче дәрәҗә, Галиева А. 2 нче дәрәҗә, Салахова А., Рәшитова А., Саттарова Д., Әһлетдинова Э. 3 нче дәрәҗә диплом белән бүләкләнделәр. Ә Хаҗиев А., Гарипов Р., Маннапова А., Фарсыева Э. кызыксындыру бүләкләре тапшырылды. Җитәкчеләре Әһлетдинова Л.Ф.