Буген мәктәпкә әзерлек группасы балалары, тәрбияче Насыйрова Г.Р. җитәкчелегендә "Казлар -аккошлар" әкиятен сәхнәләштереп башка группа балаларына тәкъдим иттеләр. Балаларның актерлык осталыгы,  зәвык белән әзерләнгән костюмнар, декорацияләр - балаларның игътибарын җәлеп итерлек итеп әзерләнгән иде.Балалар чараны зур кызыксыну белән карап, рольләрне башкаручыларны алкышларга күмделәр.

Буген бездә  кунакта балаларның иң кадерле , иң яраткан кешеләре булды, бакчабызда "Әниләр көне"нә багышланган бәйрәм кичәсе узды. Бәйрәмдә барлык төркем балалары үз һөнәрләрен күрсәтеп, әниләрне, дәү әниләрне, килгән кунакларны таң калдырды. Әниләргә багышланган шигырьләр, җырлар, биюләр,  ә бигрәктә әтиләрнең әниләрне   котлаулары, кызлары белән бергә биюе,оркестрда балалар белән берлектә  мавыктыргыч көйләр башкаруы, шигырьләр башкаруы беркемне дә битараф калдырмады. 

Бакча коллективы барлык әниләрне бәйрәм белән  тәбрик итә һәм  бәйрәмдә катнашкан барлык әтиләргә рәхмәтләрен җиткерә!!!

Театр атналыгын дәвам итеп, бүген зурлар төркеме балалары(тәрбияче Шайхулова А.Г.) А.Алишның "Сертотмас үрдәк" әкиятен сәхнәләштерделәр. Кызыклы геройларның рольләрне оригиналь башкаруы, үзенчәлекле сәхнә бизәлеше, костюмнар -  балаларны әкият иленә алып кереп киттеләр. Сертотмас үрдәкнең  җәнлекләр белән очрашу, килеп чыккан катлаулы ситуациядан чыгу юлларны эзләү - тамашаны күзәтеп утырган бер баланы да битараф калдырмады. Тамаша бик уңышлы чыкты, балалар кәнагатъ булып, группа төркемнәренә таралдылар

Киләчәк буынны милли традицияләр нигезендә тәрбияләү, җырлы-биюле уеннар аша гасырлар буена үткәрелгән татар халык йола бәйрәмнәрен саклап калу  максатыннан бакчабызда “Су буенда кичке уен” исемле фольклор бәйрәме үтте. Бәйрәмне Асылова Д.М., Басыйрова Ч.И. һәм зурлар төркеме балалары әзерләде.Бәйрәмдә “Башмаклы”, “Чума үрдәк, чума каз”, “Пар табышлы” кебек уеннар уйналды, мәзәкләр, такмаклар әйтелде, җырлар җырланды. Бәйрәм балаларда зур кызыксыну уятты

Татар халык иҗатын,

Милли гореф - гадәтен,

Тугры халык антларга

Сүз бирәбез сакларга, дигән нәтиҗә ясап, балалар төркемнәренә таралдылар

Туган җирен ташлап кошлар китә

Кыйгак-кыйгак, җирем, хуш илем.

Күпкә китмим, кайтыр өчен китәм,

Туган җирем сагынып көт мине.

Бүген бакчабызда “Кошларны озату” бәйрәме үтте. Аны уртанчылар төркеме балалары, тәрбияче Әдһәмова К.В., музыка җитәкчесе Басыйрова Ч.И. әзерләп башка төркем балаларына күрсәттелеләр. Балалар бәйрәмдә, кошларның табигатьнең күрке, яме, нәфис гәүдәле, ялтыравык матур каурыйлы дусларыбыз икәненә тагын бер кат төшенделәр. Аларга озын юлларны исән-имин үтеп, кабат безгә кайтуларын, ә кышлаучы кошларга салкын кышларны   исән-имин уткәрүләрен теләп, бәйрәмнән таралдылар.

Воспитатель нашего ДОУ Адгамова Кадрия Васимовна стала победителем Всероссийского конкурса "Я знаю ПДД!" с конкурсной работой "Юлда акыл бик кирәк!". Поздравляем с победой , желаем дальнейших творческих успехов!!!

Кырлар буш кала,

Янгырлар ява.

Җирләр дымлана,

Бу кайчак була?

Бакчабызда "Уңышлы көз бәйрәме"  исемле бәйрәм иртәсе узды. Аны мәктәпкә хәзерлек группасы балалары, тәрбияче Галимова Рима Николай кызы, музыка җитәкчесе Басыйрова Чулпан Инсаф кызы әзерләделәр.

Балалар көз турында шигырьләр сөйләделәр, җырлар башкардылар, кунакка килгән Гномга мәкальләр эйттеп, Ачулы Болытка биюләр биеп, Көз кызы белән бергә  күңел ачтылар.

Бүген бакчабызга кунакка өлкәкәннәребез җыелды. Балаларга белем һәм тәрбия бирүгә  тормышларын багышлаган апаларны түземсезлек белән зурлар төркеме балалары, тәрбияче апалары Шайхулова Ә.Г., музыка җитәкчесе Басыйрова Ч.И   көтеп алдылар. Кунакларга балалар бик күп җылы сүзләр җиткерделәр , матур җыр-биюләр  башкардылар.Бәйрәм чәй табаны артында дәвам итте.

Бүген бакчабызда белем көненә багышланган чаралар узды. Мәктәпкә әзерлек төркеме балалары, музыка җитәкчесе Басыйрова Ч.И., тәрбияче Насыйрова Г.Р. белән берлектә башка төркем балалары өчен мавыктыргыч бәйрәм иртәсе әзерләп, күрсәттеләр. Матур җырлар, шигьри юллар, биюләр белән үрелеп барган бәйрәм барлык балаларның күңеленә хуш килде. Хәйләкәр төлке белән усал бүренең бәйрәмгә килеп, Белем  Иленең ачкычын балаларга тапшыруы, бәйрәмне тагын да ямьләндереп җибәрде.