17 нче апрель көнне 5а сыйныфы укучылары Г.Камал исемендәге театрда алдынгы сәхнә технологияләре, заманча музыка һәм биюгә корылган режиссер Радик Бариевнең “Кечтүкле уен” спектаклен карадылар.Кайчандыр үзләре уйлап чыгарган куркыныч уенга эләккән дуслар Ак чәчәкләр илен Кара көчләрдән коткаралар. Яхшылык һәм яманлык, дуслык һәм нәфрәт турында булган бу спектакль балаларга бик ошады.

Г.Тукайның шигырьләрен белмәгән татар кешесе юктыр. Кыска гына гомере эчендә халыкның рухына үтеп керерлек әсәрләр калдырган ул.

13 нче апрель көнне гимназиябездә Габдулла Тукайның 130 еллык истәлегенә багышланган дәрес-конференция үткәрелде. Анда 8а һәм 10 сыйныф укучылары катнашты. 10 сыйныф укучылары сөекле шагыйребезнең тормыш юлы һәм иҗатына багышланган чыгышлар ясадылар. Тукай иҗаты – үлемсез!

    15.04.16. Васильево бистәсендә үсмерләр арасында волейбол буенча зональ ярышлар төгәлләнде. Аның нәтиҗәләре буенча гимназиябезнең кызлары 3-нче урын, ә егетләре – 2-нче урынны яулады! Финалга үтүче команда Яшел Үзәнгә барырга дип әзерләнә. Афәрин, укучылар!

     Яшел Үзән районының 3нче гимназиясендә “Синең юлың космоска” дигән Гагарин укулары булып узды.  Анда безнең гимназиядән 8а сыйныф укучылары-Чанышев Рамиль (җитәкчесе:Еремеева Р.Р.) һәм Нуриев Адель (җитәкчесе: Галиева Г.Ш.) катнаштылар. Икесе дә уңышлы чыгыш ясап, җиңүгә ирештеләр, диплом белән бүләкләнделәр. Котлыйбыз!

      Гимназиябездә Космонавтика көненә багышлап чаралар үткәрелде. Физика укытучысы Еремеева Рузинә Рахимовна 4-5 сыйныфларга  бу көннең  бәйрәм,  һәм  илебез өчен зур горурлык икәнен аңлатты. Беренче космонавт-Юрий Алексеевич Гагарин белән таныштырды. Укучылар рәсемнәр ясадылар, матур итеп бу турыда сөйләделәр.Үзара ярышып, кәгаздән әзерләнгән  ракета да җыеп карадылар.

13.04.2016 мәктәбебезнең инглиз теле укытучысы Еремеева Валентина Николаевна зур юбилеен билгеләп үтте.

Хөрмәтле Валентина Николаевна,

Сезне зур бәйрәмегез белән тәбриклибез!

Туган көн – гомер бәйрәме,

                                           Туган көн – изге көн ул.

Сәламәт булыгыз, кайгы күрмәгез,

Барчабыздан теләк шул.

      Гимназия коллективы

       Бүген гимназиябездә бөек шагыйребез Габдулла Тукайга багышланган шигырь

бәйгесе узды. Сөйләүче укучылар бу эшкә бик җитди карадылар. Шигырьләрне

дулкынланып, зур көч биреп башкардылар.

        Габдулла Тукайга багышланган айлык дәвам итә.

    3а сыйныф укучылары укытучы Гатауллина Г. Р., педагог – оештыручы Магизова Н. Х. җитәкчелегендә бистәбездәге “Алёнушка” балалар бакчасында булдылар. Алар нәниләргә  Г. Тукайның “Шүрәле” әкиятен сәхнәләштереп күрсәттеләр. Бу чара бөек шагыйребезнең тууына 130 ел тулу уңаеннан, “Мин татарча сөйләшәм “ акциясе кысаларында үткәрелде. 

     8.04.16.Мәктәп күләмендә үткәрелгән чара “Музыкаль гаилә”, елдан-ел колач җәя бара. Бу тәрбияви-күңел ачу кичәсендә гаиләләр ел саен бик теләп һәм актив катнаша. Быел ун гаилә катнашып, төрле номинацияләргә  ия булдылар: Җәләевлар –  “Иң җитез гаилә”, Шакировлар –  “Иң оста җырчылар”,  Нуруллиннар – “Иң оста гаилә”, Рахимовлар –  “Иң белемле гаилә”, Җәмалиевлар –  “Иң дус гаилә”,  Хөснетдиновлар – “Иң сөйкемле гаилә ”, Сафиуллиннар –  “Иң иҗади гаилә”, Миннуллиннар – “Иң тәрбияле гаилә ”, Исаенковлар –  “Музыкаль гаилә -2016”.  Афәрин, дуслар!  

11 нче апрель көнне гимназиябез укучылары Бөтенроссия “Зирәк тиен 2016” уен-бәйгесендә катнаштылар. Алар, татар теленнән алган белемнәрен кулланып, сорауларга җавап бирделәр. Бәйгенең максаты – укучыларда татар телен өйрәнүгә кызыксыну уяту, аларның сәләтләрен үстерүгә ярдәм итү. Чынлап та, туган телебез – олы хәзинә.