Соңгы мәртәбә, кулыгызга каләм алып, диктант язганыгызны хәтерлисезме? Без менә әле бүген генә яздык. Бер без генә түгел, Татарстан һәм аннан читтә яшәүче милләттәшләребез дә уку елларын исенә төшерде бүген. Матур гадәткә әйләнгән "Татарча диктант" акциясендә, коллективыбыз белән берничә ел рәттән катнашабыз.⠀ ⠀ Акциянең асылы ‒ Россия Федерациясе һәм дөньяның төрле шәһәрләрендә барлык теләгән кешеләр өчен ихтыяри һәм бушлай уздырыла торган диктант. Акциядә һәр кеше катнаша ала. Быел татарча диктант җиденче тапкыр уза. Диктантны кәгазьдә яки сайтта клавиатура ярдәмендә язып була. Online диктантны язганнан соң тиз арада нәтиҗәләрне шәхси кабинетта белә алачаксыз. Ә offline мәйданчыкларда язылган диктантның нәтиҗәләре 27 декабрьдән соң diktant.tatar сайтында билгеле була.