Мәктәп еллары... Рәхәт тә, куанычлы да, ваемсыз да, тынгысыз да мәктәп еллары. Моның шулай икәнен бары тик мәктәпне тәмамлар чак җиткәч, белем алган мәктәбеңнән читтә булганда гына аңлыйсың.
Бүгенге көннән башлап чыгарылыш сыйныфлар өчен кыңгыраулы мәктәп еллары үзенең ыгы-зыгысы, күңелле мизгелләре, борчу-мәшәкәтьләре белән артта калды. Безнең 11 нче сыйныф укучыларының бүген “Соңгы кыңгырау” бәйрәме үтте. Бу гадәти булмаган (онлайн форматта) чарада 2020 нче ел чыгарылыш укучылары, аларның әти-әниләре, укытучылар катнашты. Чара гимназиябез директоры Шәмсиева Гөлфия Гаязовнаның чыгышы белән башланып китте. Ул укучыларга алдагы тормышларында, имтиханнарында уңышлар теләде, бәйрәм белән тәбрикләде. Аннан чыгарылыш сыйныфка Казан шәһәре мэры Метшин Илсур Рәисовичның чыгышы яздырылган видео форматында котлау җиткерелде. Сүз, әлбәттә, чыгарылыш сыйныф укучыларының киңәшчеләре, сыйныф җитәкчеләре Мингалиева Римма Ростамовнага да бирелде. Ул балаларга үзенең иң матур, иң изге теләкләрен җиткерде.Шулай ук барлык укытучыларның, әти-әниләрнең теләкләре яздырылган видеоязмалар да әзерләнгән иде. Ә 2020 нче елгы чыгарылыш сыйныфы, үз чиратында, барысына да хөрмәт һәм ихтирам тулы рәхмәтләрен белдерде.
Мәктәп еллары :кызыклы дәресләр, шау-шулы тәнәфесләр, төрле сәяхәтләре белән искә төшә. Мәктәп еллары һәр кеше тормышында зур урын алып тора, чөнки ул еллар – балачак еллары. Ә балачакны беркемнең дә читләтеп үтә алганы юк. Үзебезнең яраткан укучыларыбызга алдагы тормыш юлларында гел уңышлар гына телибез. Гимназиябезнең горурлыгы булып, зур үрләргә ирешергә язсын аларга!