Бүгенге көндә кешелекне борчыган иң кискен мәсьәләләрнең берсе – экология проблемасы. Әлеге тема белән без балачактан ук таныш булырга тиешбез. Табигатьне саклау турында балаларга кечкенәдән үк сөйләп, аңлатып торырга кирәк. Бу уңайдан Татарстанда шактый чаралар күрелә. Төрле конкурслар, акцияләр гел булып тора. Шуларның берсе – “Эковесна 2019” конкурсы.
Конкурста безнең укучылар да читтә кала алмады. Алар зур кызыксынучанлык белән әлеге эшкә тотындылар һәм җиңеп тә чыктылар. Балаларны котларга ТР экология һәм табигый ресурслар министрлыгының территориаль идарә итү үзәгенең 3 нче разрядлы өлкән белгече Сабирзянова Альбина Олеговна килде. Ул әлеге чарада җиңгән “Чишмә” отрядына бүләк һәм диплом тапшырды. Балалар үзләренең эшләре шундый зур игътибарга алынуга бик куандылар. Бу отрядны алга таба тагын да күбрәк җиңүләр көтүенә ышанабыз һәм уңышлар телибез.