Гимназиядә башланган бәйрәм Казансу елгасы яры буенда дәвам итте. Бүген бөтен чыгарылыш сыйныф укучылары өчен соңгы кыңгырау шалтырады. Быел соңгы кыңгырау шәһәрнең барлык 11нче сыйныф укучыларын Казансу елгасы яры буенда урнашкан үзәк мәйданнарның берсенә җыйды. Бу мәйданда соңгы кыңгырауның әле тәүге тапкыр шалтыравы. Гимназиянең 11нче сыйныф укучылары да шәһәребезнең барлык чыгарылыш сыйныф укучыларын олы юлга - мөстәкыйль тормыш юлына озаткан кыңгырауның соңгы чыңлавын тыңларга бардылар. Башлап 11нчеләрне Мәгариф һәм фән министры Э. Фәттахов котлады. Казанның төрле югары уку йортларыннан килгән ректорлар һәрберсе аерым-аерым чыгыш ясап, укучыларны һөнәрләрен дөрес итеп сайларга өндәде. Казан мэры И. Метшин да чыгарылыш сыйныф укучыларын бәйрәмнәре белән шәхсән котларга килгән иде: үзенең изге теләкләре соңында И. Метшин алмашка киләчәк яшь буынны символлаштырган ак алъяпкыч, ак бантлар таккан кечкенә кызчыкны иңенә утыртып, чыгарылыш сыйныф укучыларына соң мәртәбә чыңлаган кыңгырау тавышын тыңлатты.