Биектау районы элек-электән данлы көрәшчеләргә бик бай. Шундыйларның берсе Шәйдулла Хәйруллин. Ул 1927 елда милли көрәш буенча Бөтенсоюз ярышларында чемпион исемен яулый. Ә 1929-1930 нчы елларда Бәрәзә Хафизны җиңеп, ТАССРның беренче батыры нәкъ менә ул булуын раслый.

Шәйдулла Хәйруллин истәлегенә багышлап безнең мәктәптә 19 март көнне район күләмендә милли көрәш бәйгесе узды. Бу ярышка зур кунаклар килде. Шулар арасында  муниципаль район башлыгы Рөстәм Галиулла улы Калимуллин да бар иде. Якын тирәдәге атаклы көрәшчеләр дә бик куп килгәннәр иде.

Бу бәйгедә барысы 76 яшь көрәшче катнашты. Алар яшь булуларына карамастан, бик матур алымнар күрсәттеләр. Хөкемдарлар тарафыннан Зур Битаман урта мәктәбенең 9 нчы сыйныф укучысы Рөстәм Файзрахманов  көндәшен иң чиста күтәреп алып келәмгә салучы булды. Рафис Халиуллин  тамашачылар күңеленә аеруча хуш килде. Киеренке гадел көрәштә үз үлчәү төркемнәрендә безнең мәктәп егетләре арасында беренче урыннарны Рафис Халиуллин, Рәмзил Сабитов, Рөстәм Файзрахманов, Алмаз Садриев, Рамил Габдрахманов яулады, икенче урын Илфат Ибраһимовка бирелде, өченче урын Рәмис Гайнетдиновка, Фирдүс Габдрахманока бирелде. Урын яулаучылар акчалата бүләкләнделәр.

Команда беренчелегендә дә безнең мәктәп җиңде, безгә зур Кубок, мактау грамотасы һәм чын батырлар бүләге - тәкә бирелде. Көрәшчеләр ял иткән арада, аларга узебезнең авыл җырчылары үзләренең җырларын бүләк иттеләр.

Галереяда фотосурәтләрен карагыз