20 август көнне “Таттелеком” акционерлык җәмгыятенең баш инженеры Айнур Зәйнетдинов җитәкчелегендә Тиләҗе башлангыч мәктәбендә Иске Җөри урта мәктәбенә, Тиләҗе, Караширмә, һәм Орымширмә башлангыч мәктәпләренә беренче сыйныфка укырга керүче укучыларга “Мәктәпкә әзерләнергә ярдәм ит!” акциясе кысаларында мәктәп кирәк-яраклары тутырылган букчалар тапшырдылар. Чарада быел беренче сыйныфка укырга барачак балаларның әти- әниләре, беренче сыйныф укытучылары, Тиләҗе башлангыч мәктәбе директоры Марсилә Хәйруллина һәм Иске Җөри урта мәктәбенең тәрбия эшләре буенча директор урынбасары Наилә Бадриева катнашты. Айнур Таһир улы балаларга, әти-әниләргә, укытучыларга иң изге теләкләрен ирештерде: « Бу көн матур бер мизгел булып исегездә саклансын. Тырышып укыгыз. Әти-әниләрегезне яхшы билгеләр белән сөендерегез. Сезгә якты киләчәк, укуда зур уңышлар, әти-әниләргә сабырлык, шатлык, куанычлар телим. Балаларыгызның уңышларына сөенеп яшәгез”.