24 нче май көнне Иске Җөри урта гомуми белем бирү мәктәбендә “Соңгы кыңгырау” бәйрәме  узды.  Бәйрәмдә 11 нче сыйныф укучыларының әти-әниләре, ветеран укытучылар, беренче укытучылары, авыл халкы бик теләп катнашты. Бәйрәм чарасын мәктәп директоры Салават Сатлыкович ачып җибәрде. Ул фән олимпиадаларында җиңү яулаган, спортта актив катнашкан укучыларга Мактау грамоталары тапшырды. Шулай ук Иске Җөри авыл җирлеге башлыгы Раил Мараков, элеккеге мәктәп директоры, Ветераннар Советы рәисе Илгиз Галиуллин, беренче укытучылары, сыйныф җитәкчеләре һәм әти-әниләре дә укучыларга үзләренең изге теләкләрен җиткерделәр.  Бәйрәмне 9нчы һәм 11 нче сыйныф укучылары дәвам итте. Алар бик тә күңелле һәм бер үк вакытта ямансу да булган концерт прогаммасы тәкъдим иттеләр. Концерт номерлары аша алар укытучыларына ,әти-әниләренә, сыйныф җитәкчеләренә булган хөрмәтләрен күрсәттеләр, рәхмәтләрен җиткерделәр. Һәрберсенең күзләрендә яшь бөртекләре иде. Алар өчен соңгы тапкыр кыңгырау чылтырады. Алга таба аларга яңа тормыш башлана.Хәерле сәгатьтә!