26 нчы октябрь көнне Совет районы күләмендә «Татар кызы - 2017» конкурсы булып узды.  Ел саен үткәрелеп килә торган әлеге бәйгедә Советлар Союзы Герое С.Ә.Әхтәмов исемендәге 121нче лицей(178 мәгариф үзәге)укучылары һәрвакыт югары нәтиҗәләргә ирешәләр. Быелгы бәйге дә шуңа мисал. 11 нче сыйныфта белем алучы укучы кызларыбыз  Шәйдуллина Эльза 3 нче урынга, ә Хәйретдинова Айгөл “Иң зәвыклы кыз” номинациясенә лаек булды. Укучылар үзләрен лаеклы рәвештә тәкъдим иттеләр! «Таныш булыгыз»  дип аталган беренче турда, үзләре турында үзенчәлекле формада, яшәү рәвешләре, уй-максатлары һәм ирешелгән нәтиҗәлре турында бәян иттеләр. Икенче турда “Табигатьне саклыйк” дигән темага саф татарча, матур итеп соауларга җавап бирделәр. Ә инде өченче тур, татар халкының бөек улы - Кәрим Тинчуринга багышланган иде. Әлеге турда да укучы кызларыбыз сынатмады. Кәрим Тинчуринның мәңге яшәр “Зәңгәр шәл” спектакленнән бик уңышлы өзек тәкьдим иттеләр.

Конкурсант кызларны  әзерләүче мөхтәрәм мөгаллимнәребезгә Вәлиуллина Рәмзия Һашим кызы, Миннегалиева Айгөл Илдус кызы, Мөхәммәтова Фирдәвес Габделбәри кызы, Мифтахова Гөлнур Мәхмүт кызына һәм  Садеева Аида Рафаэль кызы җитәкчелегендәге бию коллективына рәхмәтебезне җиткерәбез! Уңышлары белән котлыйбыз! Киләчәктә дә һөнәри һәм иҗади уңышлар теләп калабыз!