Шәрләрәмә мәктәбендә 18 март көнне Ленинград шәһәрен саклауда катнашкан сугыш ветераны Динмехәмәтов Гайсә абыйның кызы, озак еллар мәктәптә рус теле һәм әдәбияты укыткан Хадиева З.Г. белән очрашу булды.    Ул әтисе турындагы истәлекләр белән уртаклашты. Укучыларга аның төрле елларда төшкән карточкаларын, орден-медальләрен күрсәтте. Гайсә абыйга тыныч тормышта үзе сугышкан җирләрне күреп кайтырга насыйп булды.     Зөлфия Гайсовнаның чыгышында әтисе белән чиксез горурлану сизелеп торды.

    Быел илебез олы бәйрәм - Бөек Җиңүнең 70 еллыгын билгеләп үтәчәк. Күкләребезнең аяз булуы белән без сугыш һәм тыл ветераннарына бурычлы. Бүгенге класс  сәгатендә шулар турында Шәрләрәмә мәктәбенең 5 класс җитәкчесе Шәйгарданова З.Х.  сөйләде.

13 март көнне Шәрләрәмә мәктәбе укучылары -  Хадиев Рөстәм  белән  Шәйгарданов Рамил - Сарайлы авылы мәдәният йортында үткәрелгән гер күтәрү ярышында катнаштылар.

 12 март көнне МБББУ “Шәрләрәмә төп гомуми белем бирү мәктәбе”ндә район кино челтәре хезмәткәрләре “ Бөек Болгар” исемле фильм күрсәттеләр. Бу фильмнан укучылар борынгы болгар бабаларыбызның көнкүреше, аларның тарихи язмышы турында күп мәгълүмат алдылар.

10 март көнне Ләшәү Тамак мәктәбендә тәрбия эшләре буенча директор урынбасарларының  район семинары булды. Укучыларга патриотик тәрбия бирүгә  багышланган бу семинарда Шәрләрәмә мәктәбеннән Гыйльфанова Р.Ф. катнашты. Ул караган чаралар, тыңлаган чыгышлар турында  мәктәп укучыларына җентекләп сөйләде,  музейда алган тәэсирләре белән уртаклашты.

5 март көнне Шәрләрәмә мәктәбендә язның беренче бәйрәме-Халыкара хатын-кызлар көненә багышланган бәйрәм үткәрелде. Укучылар, ике командага бүленеп, төрле конкурсларда катнаштылар, әниләргә матур җырлар, шигырьләр, биюләр бүләк иттеләр. Бәйрәм чәй өстәле янында дәвам итте. Бәйрәм бик күңелле үтте.

5 марта  состоялась встреча с родителями учащихся выпускного 9-го класса. Основная тема: «Порядок проведения государственной итоговой аттестации по образовательным программам основного общего образования». 

     5 март көнне Шәрләрәмә мәдәният йортында Бөек Җиңүнең 70 еллыгы уңаеннан тыл ветераннарына юбилей медальләре тапшыру тантанасы булды. Ветераннарны  Сарман районы аппарат җитәкчесе Вәлиев Ф.Ә., авыл ветераннары рәисе Шәйгарданова Р.Х котлады. Бәйрәмне китапханәче Әлфия Салихҗанова алып барды.  Сугыш чоры истәлекләре белән уртаклашу чәй өстәле янында дәвам итте.  Ветераннар бүгенге тыныч тормышның кадерен белеп яшәргә өндәделәр. Бу чарада мәктәп коллективы да катнашты.

4 март көнне Шәрләрәмә мәктәбендә беренчеләрнең Әлифба бәйрәме булды. Бәйрәмдә әти-әниләр, әбиләр, укучылар, укытучылар катнашты. Рузиль, Риназ һәм Раил төрле биремнәр буенча белемнәрен сынаштылар. Бәйрәм азагында аларга Әлифбаны уңышлы тәмамлау турында дипломнар тапшырылды.

Шәрләрәмә мәктәбенең 7 классында Бөек Җиңүнең 70 еллыгына багышлап төрле чаралар үткәрелә. Бүген үткәрелгән класс сәгатендә алар Муса Җәлилнең көрәштәше Зиннәт Хәсәновнең тормыш юлын өйрәнделәр.  Җиңүнең 65 еллыгына багышланган “Татарстан Бөек Ватан сугышы елларында”  китабы белән танышуны дәвам иттеләр.