Бистәбезнең «Каенкай» балалар бакчасында искиткеч матур һәм җаваплы вакыйга – «Татар малае, татар кызчыгы – 2026» муниципаль бәйгесе булып узды. Бу чара яшь буынның йөрәгендә туган телгә, халкыбызның тарихына һәм рухи байлыгына карата мәхәббәт уятуны төп максат итеп куйды.
Бәйге районның мәктәпкәчә белем бирү учреждениеләрендә тәрбияләнүче иң сәләтле, иң актив балаларны бер сәхнәдә җыйды. Кечкенә артистлар үзләренең осталыкларын, сәнгатьле чыгышларын һәм милли үзенчәлекләрен күрсәттеләр. Таныштыру этабыннан башлап, һәр чыгыш үзенчәлекле һәм истәлекле булды. Нәтиҗәдә, безнең балалар бакчасыннан Талибуллина Динара «Иң тыйнак кыз», ә Рузаль Садыков «Иң оста малай» номинациясендә лаеклы җиңү яуладылар. Бу уңыш – бары тик уртак тырышлык нәтиҗәсе. Балаларыбызны бәйгегә әзерләүдә зур көч куйган педагогларыбызга, аларны яклап-саклап торган, рухландырган әти-әниләргә чиксез рәхмәтебезне белдерәбез. Киләчәктә дә милләтебезнең йөз аклыгы булырлык, сәләтле балаларыбыз күп булсын!