Бүген безнең балалар бакчасында кошлар кайтуына багышланган, татар халкының милли бәйрәмнәренең берсе - ”Карга боткасы” узды. Балалар, матур итеп киенеп, каргалар кайтуын күзәттеләр. Өйдән-өйгә йөреп, әби-бабалардан күчтәнәчләр җыеп, аларга изге теләкләр теләделәр. “Учак” ясап ботка пешерделәр. Ә инде ботка пешкәнче рәхәтләнеп биеделәр, җырладылар; “Болында”, “Яшел кулъяулык”, “Сукыр тәкә”, “Ачык авыз” һәм башка яраткан уеннарын уйнадылар. Бәйрәм азагында балалар тәмле, майлы ботка ашадылар һәм җирдән муллык, кояштан җылылык, табигатьтән бәрәкәт, күктән яңгыр теләделәр. Бәйрәм бик күңелле үтте.