Бүген 9нчы сыйныф укучыларына аттестат тапшыру тантанасы булып узды. Бу көнне мәктәп7 баланы тормыш дигән олы юлга озатты. Мәктәп директоры, укытучылар,әти-әниләр,килгән кунаклар чыгарылыш укучыларына бары тик иң изге теләкләрен генә җиткерделәр. Мәктәп директоры Газизҗанова Гөлнур Вакыйф кызы «Бүген сез өлгергәнлек аттестаты алдыгыз, бу сезнең тормышыгызда белемегез дәрәҗәсен исбатлаучы беренче документ. Киләчәктә мондый документлар күп булыр, тик шулай да сезне укырга- язарга өйрәткән мәктәбегезне, укытучыларны онытмагыз. Әти — әниләрегезгә игелекле балалар, дусларыгызга тугрылыклы иптәш булыгыз. Бердәмлегегезне саклагыз, еллар узгач та бергә җыелып сөйләшергә уртак сүзләрегез булсын. Тормышыгыз тау чишмәсе кебек ярсу, куйган максатларыгыз нык булсын», — дип изге теләкләрен ирештерде. Уку йортларына кергәндә уңышлар теләде. Укучылар укытучыларына, әти -әниләренә булган рәхмәт хисләрен матур җырларга, биюләргә төреп бүләк иттеләр. Моңлы да, шатлыклы да иде бу көн!