Мәктәпнең традицион тәрбия чараларына тугры калып, быел Нәүрүз бәйрәмен 22 мартта үткәрдек. Оештыручылар татар теле һәм әдәбияты укытучылары аңа бөтен көчен куйдылар, һәркемне катнаштырырга тырыштылар.
Бәйрәм Нәүрүз көненең тарихын искә төшерү белән башланды. Нәүрүзбикәнең монда килүе ямь өстәде. Аның артыннан Кыш бабай килде. Нәүрүзбикә белән озак “тарткалаштылар”, бигрәк тә кышның китәсе килмәде. Балалар озакка сузылган суыклардан, авырулардан тәмам арыган. Шуңа да Кыш бабайны якламадылар. Ул укучылар белән җырлап- биеп, күңел ачып калырга ашыкты. Нәүрүзбикә үзенең бүләкләрен өләште.
Укучылар кашыкка йомырка куеп йөгерү, капчык киеп йөгерү , аркан тарту ярышларында көч сынаштылар. Ләкин җиңелүче булмады, һәркемнең йөзендә елмаю, канәгатьләнү хисе чагылды. Башлангыч сыйныф укучылары шигырьләр сөйләделәр, табышмакларга җаваплар таптылар, тапкыр икәнлекләрен күрсәттеләр, милли уеннарны яратып уйнадылар . Бәйрәм күнелле рухта барды. Кыш бабай белән Нәүрүзбикә дә уртак тел табып, бергә күңел ачтылар.

Бәйрәм азагында Нәүрүзбикә балаларны коймак белән сыйлады..
Һәр бәйрәмнең үз тәртибе, гореф- гадәтләре, кыйммәте бар. Татар халкының милли йолаларын кечкенәдән үк балаларга аңлатсак, бергәләп үткәрсәк, буыннар арасында дәвамлылык, миллилек хисе югалмас.

Мәктәп администрациясе Нәүрүз бәйрәмен үткәрүдә ярдәм итүләре өчен 10б сыйныфы укучылары Кукаркин Булатка , Дадажанова Мәстүрәгә, Мотыйгуллина Камиләгә, 10А сыйныфы укучысы Сафина Камиләгә, 5А сыйныфы укучылары Даутов Әмиргә , Шәрәфиева Зәринәгә, 6А сыйныфы укучысы Калабанова Анжелага рәхмәт белдерә!