17 нче апрель көнне Муса Җәлил исемендәге 1 нче татар гимназиясендә милли эшләр буенча директор урынбасарларының “Укучыларның танып-белү активлыгын үстерүдә метод һәм формаларның күптөрлелеге” дип исемләнгән киңәшмәсе узды. Киңәшмәнең кереш өлеше гимназия директоры Ә. С. Әхмәтҗанованың кереш сүзе белән башланды, милли мәгариф торышы хакында мәгълүмат бирелде. Киңәшмәдә 1 нче гимназиянең татар теле һәм әдәбияты укытучылары Хәйруллина Г. Р., Сөнгатуллина Л. М. тарафыннан әзерләнгән дәресләр каралды. Шулай ук 1 нче гимназиянең директор урынбасары З. З. Сафиуллина, 16нчы, 8 нче, 22 нче гимназиянең татар теле һәм әдәбияты укытучылары Р.Н Шәрифуллина., Л.Г. Шәймурзина, Л.А. Шиһапова чыгышлары тыңланды.

Милли мәгариф өлкәсендә үткәрелә торган күп кенә чараларда катнашып, яшь буынны тәрбияләүгә үзләреннән зур өлеш кертүче Аксакаллар шурасы әгъзалары Һадиуллин Мәснәви Габдуллович, Ягъфәров Мингаян Ягъфәрович, Минһаҗев Суфиян Минһаҗевич һәм мәгариф идарәсенең укыту-методик яктан тәэмин итү бүлеге методисты Сабирова Гөлүсә Мөхәмәтхәсәновна тарафыннан 1нче гимназия коллективының укыту-тәрбия процессын дөрес юнәлештә оештыруы билгеләп үтелде һәм катнашучыларга фидакарь хезмәтләре өчен зур рәхмәт белдерелде.