Шәһәребезнең 28 нче рус белем бирү мәктәбендә 19 нчы декабрь  көнне татар теле һәм әдәбияты укытучылары өчен төбәкара семинар уздырылды. Семинарның  темасы ”Татар теле һәм әдәбияты дәресләрендә уку грамоталылыгын формалаштыру”.  Семинарда  мәктәбебезнең татар теле һәм әдәбияты укытучылары ачык дәресләр, мастер – класслар күрсәттеләр. Дәресләрдә укучыларны укуга кызыксындыру, әсәрләргә мәхәббәт уяту  максатыннан төрле алымнар файдаланылды.   Семинар алдыннан  мәктәп эшчәнлеге белән директор Илдар Гарифҗан улы таныштырды, соңыннан мәктәп укучылары тарафыннан  халкым моңннары уен кораллары  аша җиткерелде. Рус мәктәбендә белем алучы балаларның гармунда, курай һәм гитарада уйнаулары кунакларның күңеленә хуш килде.  

        Музей аша укучыларга гореф-гадәтне тапшыру бигрәк тә отышлы булды.      Музейның  “Палеонтология”,  “Сугыш чоры геройлары”, “Татар өе”, Рус йорты”  бүлекләренең экспонатлары турында математика укытучысы Илнур Фаил улы тулы итеп сөйләде. Соңыннан шушы эшне дәвам итеп, үз авылларында музей ачкан укучыбыз Вәлиев Дамирның сөйләме күпләрне сокландырды.

        Семинарда катнашкан укытучылар, мәгълүмати-методик үзәк белгече Хисаметдинова Рәшидә Фидаил кызы эшчәнлекне югары бәяләде.