30 нчы октябрь көнне Казан шәһәренең 4 нче гимназиясендә композитор Сара Садыйкованың тууына 109 ел тулу һәм С.Садыкованың кызы Әлфия Айдарскаяга 90 яшь тулу уңаеннан “Калфаклы сандугач-2015” татар җыры һәм музыка уен-коралларының VIII төбәкара ачык фестиваль - конкурсы булып узды. Төрле төбәктән 130 га якын укучы катнашты. Шулар арасында Мөслим районыннан да укучылар бар иде. Мөслим балалар сәнгать мәктәбенә йөрүче, Мөслим лицеенда белем алучы Нуриева Э. жыр номинациясендә Мәгариф һәм фән министрлыгының I нче дәрәҗә җиңү Дипломына, кызыксындыру бүләгенә ия булды һәм Гала концертта чыгыш ясау хокукы алды. Җитәкчеләре югары категорияле музыка укытучылары Мөршидә Әхмәтҗанова белән Лилия Заянова. Э. Нуриевага киләчәктә дә шулай моңлы тавышы белән районыбызның горурлыгы булып яшәвен теләп калабыз.