Мөслим районында "Татар әдәбияты һәм сәнгате көннәре” кысаларында, бүген Мөслим лицеенда “Әдәби мәйдан” исемле чара узды. Чарада шагыйрә, телевизион һәм радиотапшырулар алып баручы, Бөтендөнья татар конгрессы Башкарма комитетының баш референты, ТР атказанган сәнгать эшлеклесе, Саҗидә Сөләйманова, Һади Такташ  исемендәге әдәби пермияләр лауреаты, Мөслим районының Мактаулы гражданины Шәмсия Җиһангирова һәм язучы, тәрҗемәче,  Филология фәннәре кандидаты, Гаяз Исхакый, Шәйхи Маннур исемендәге премияләр лауреаты Фатиһ Котлу катнаштылар. Укучылар кунакларны “Милләтләр дуслыгы” исемле композиция һәм “Язучы белән объективта» акциясе белән каршы алдылар.  Очрашу “Әдәби ток-шоу” форматында узды. Кунаклар үзләренең иҗатлары белән таныштырдылар, шигырьләрен, хикәяләрен укыдылар, тормышларында булган мөһим вакыйгаларга тукталдылар, укучыларның сорауларына җавап бирделәр. Очрашу укучылар башкаруында җырлар, иҗади чыгышлар белән үрелеп барды һәм якты истәлекләр калдырды. Мондый очрашулар телебезне яратырга, аны саклап калырга, әдәбиятны  өйрәнергә, китап укуга кызыксыну арттырырга ярдәм итә.