Бөтендөнья татар конгрессы тарафыннан 2026 ел татар дөньясы өчен Габдулла Тукай елы дип игълан ителде. Шул уңайдан агымдагы елның 24-26 апрель көннәрендә унберенче тапкыр Дөньякүләм «Татарча диктант» белем тикшерү акциясе уздырыла. Быел ул  бөек шагыйребез Габдулла Тукайның 140 еллыгына багышлана. Мөслим лицее укучылары һәм укытучылары да әлеге акциягә кушылдылар: Габдулла Тукайның «Туган тел» шигырен һәм «Бәхет» хикәясен яздылар.  Акция татар теленә кызыксынуны арттыру, әдәби телдә дөрес сөйләм һәм дөрес язу күнекмәләрен үстерү, орфографик һәм грамматик хаталар ясамыйча язу теләге уяту, татар телен популярлаштыру максатыннан оештырыла.