Мөслим районында "Татар әдәбияты һәм сәнгате көннәре" кысаларында, бүген Мөслим лицеенда “Әдәби мәйдан” исемле чара узды. Чарада язучы, журналист, публицист, «Чаллы-ТВ» телекомпаниясенә нигез салучы, Татарстанның Язучылар һәм Журналистлар берлекләре әгъзасы, Чаллы шәһәренең Мактаулы гражданины, Татарстанның атказанган мәдәният хезмәткәре Рахман Шәфигуллин һәм шагыйрь, галим, Татарстан язучылар берлеге әгъзасы, Татарстанның атказанган фән һәм сәнгать эшлеклесе Рифат Җамал катнаштылар. Очрашу “Сорау сездән- җавап бездән” уены белән башланды. Кунаклар үзләренең иҗатлары белән таныштырдылар, шигырьләрен укыдылар, хикәяләренең язу тарихын сөйләделәр, тормышларында булган мөһим вакыйгаларга тукталдылар, укучыларның сорауларына җавап бирделәр. Очрашу укучылар башкаруында җырлар, иҗади чыгышлар белән үрелеп барды. Укучылар үзидарәсе активистлары “Язучы белән объективта” исемле акциядә кунакларга сораулар бирделәр һәм фотога төштеләр.