25 нче сентябрь көнне Татар әдәбияты һәм сәнгате көннәре кысаларында Олы Чакмакка кадерле кунаклар — күренекле язучылар Ләбиб Лерон, Илсөяр Иксанова һәм Әлфия Ситдыйкова килде.

Очрашу кысаларында язучылар иҗат серләре, туган тел язмышы һәм яшь буынны тәрбияләү турында фикер алыштылар, үзләренең иҗади юлы, китаплары һәм бай тормыш тәҗрибәсе турында бик кызыклы әңгәмәләр алып бардылар.

8-9 нчы сыйныф укучылары кунаклар хөрмәтенә, хисләр белән сугарылган, «Аллага шөкер» җырын башкардылар. 3-9 нчы сыйныф укучылары һәрбер шагыйрьнең иҗатын олылап, шигырьләрен яттан сөйләделәр. Ләбиб Леронның юморга бай, үткен эчтәлекле шигырьләрен укыганда залда көлүләр тынмады. Бу очрашулар балаларның күңелендә әдәбиятка, туган телгә карата олы мәхәббәт уятты, онытылмаслык рухи азык бирде. Әдипләребез исә укучыларга истәлекле автографлы китапларын бүләк иттеләр.