Мәктәбебездә  татар теле һәм әдәбияты атналыгы булып үтте. Укучыларны туган тел белән кызыксындыру, телнең матурлыгын тоя, үз фикерен кыска һәм төгәл итеп аңлата белергә өйрәтү , сөйләм һәм язу күнекмәләрен үстерү буенча күптөрле чаралар узды.

Укучылар шагыйрьләребезнең тормыш һәм иҗат юлларын чагылдырган презентацияләрен безгә тәкъдим иттеләр, үзләренә ошаган шигырьләрен яттан сәнгатьле итеп сөйләп күрсәттеләр, китапларын укырга киңәш бирделәр. Авылдашыбыз Мәхмүт Газизовның яңа китабын -  “Бүремалай белән Аюбай” китабын  тәкъдир иттеләр. 

Татар халкының рухи мәдәнияте, тарихы белән таныштыру, яшәүнең мәгънәсен төшендерү максатыннан, туган авылыбызның мәдәният йортында  мәктәбебезнең 7 нче класс укучылары Туфан Миңнуллинның “Әлдермештән Әлмәндәр” исемле спектаклен күрсәттеләр. Укучыларның һәркайсы  үз рольләрен җиренә җиткереп башкардылар, залда утыручы тамашачылар:” Әгәр кабатлап күрсәтсәгез, мин яңадан карар идем”,-  дип, рәхмәтләрен әйтеп таралыштылар.

 Башлангыч класс укытучылары -Калимуллина Ирина Назимовна, Минахметова Эльмира Хазиевна, Шарафутдинова Гөлнара Чулпановна укучылар белән Г.Тукай   иҗатына багышланган әкият – тамаша үткәрделәр.

Татар халык җырлары, җырлы биюле уеннар аша балаларны  халкыбызның мәдәнияте, гореф-гадәтләре белән таныштыру, халык иҗатына кызыксыну, мәхәббәт тәрбияләү, татар халкының культурасы, традицияләре белән таныштыру максатыннан “Халкымның моңлы көйләрен җырлыйм мин туган телдә” исемле кичә үткәрелде. фотолар