Укучылар арасында янгын куркынычсызлыгын пропагандалаучы “Яшь талантлар – куркынычсызлык өчен” дип исемләнгән Бөтенроссия фестиваленең муниципаль этабы кысаларында үткән конкурста безнең укучылар да катнашты. Җыр колективлары арасында үткән ярышта безнең кызлар (җитәкчесе Габидуллина Л.Ә.), янгын куркынычсызлыгы турында такмаклар башкарып 2 нче урынга лаек булдылар.

Кичә, 23 нче ноябрь көнне авылыбыз фельдшеры Сафина Л.Х. мәктәпкә килеп укытучыларга, һәм әти- әниләре рөхсәт иткән укучыларга ГРИППка каршы профилактик вакцина ясап китте. Шулай ук, туган көннәре ноябрь- декабрь аенда булган укучыларга "Манту реакциясе"н тикшерү прививкалары ясады.

Ял көннәрендә мәктәптә зур өмә булды. Мәктәп җитәкчелеге мөрәҗәгате буенча әтиләр, абыйлар мәктәп территориясен чистартуда зур ярдәм күрсәттеләр. Әлеге эшне башкару өчен электр пычкысы, балта, трактор белән килүче әтиләр дә бар иде. Яңгыр сибәләп торуга һәм көн салкынча булуга карамастан, күмәк көч белән бик зур эш башкарылды. Кадерле әтиләребезгә, абыйларыбызга без бик зур рәхмәтебезне белдерәбез.   

Мәктәптә"Олимпийский наш привет!" дигән  IX нчы республика  сәламәтлек театрлары конкурсының мәктәп этабы башланды. Конкурсны 2 нче сыйныф укучылары (сыйныф җитәкчесе Хәсәнова Ф.Г.) башлады. Бүген алар "Торна белән төлке" әкиятен темага туры китереп сәхнәләштерделәр.

Кичә, 8 ноябрьдә, Иске Чәчкаб балалар бакчасында,балалар бакчасы җитәкчеләренең район метод берләшмәсенең утырышы булды. Тәрбиячеләр Шәмсетдинова Ф.Г. хезмәт дәресеннән, балалар бакчасы җитәкчесе Хөсәенова Л.Т. рус теленнән дәресләр күрсәттеләр.

Мәктәптә фән укытучылары план буенча ачык дәресләр үткәрәләр. Чираттагысы бүген үтте. 1 нче сыйныф укытучысы Мөхетдинова Алсу Назым кызы  яңа стандартлар буенча, математикадан  "6 санын өйрәнү" дәресен күрсәтте.

Бүген мәктәптә, традицион булмаган чара - Хеллоуин кичәсе үтте. Әлеге кичәне инглиз теле укытучысы Шаһиева Алинә Габбас кызы оештырды һәм үткәрде. Чарада 5-9 нчы сыйныф укучылары 2 командага бүленеп инглиз теленнән үзләренең белемнәрен сынадылар. Укучыларның барысы да диярлек костюмнардан килгәннәр иде. Соңыннан укучылар "комната страха" дигән бүлмәгә кереп үзләренең куркуларын җиңделәр. Чара укучыларга һәм укытучыларга бик ошады.

23 нче октябрь көнне, район мәгариф бүлегенең 26 нчы сентябрьдән 53 нче № лы приказы нигезендә, мәктәптә парламент дәресе үткәрелде. Әлеге дәресне 5-9 нчы сыйныф укучылары өчен тарих һәм җәмгыять белеме укытучысы Пантелеева Т.А. үткәрде. Әлеге дәрес "Гражданинның конституцион хокуклары һәм бурычлары" дигән темага багышланган иде.

23 нче октябрь көнне мәктәбебез егетләре мини футбол буенча ярышларның район турында, Федоровское мәктәбе командасына гына бирешеп  2 нче урын яулап кайттылар. Ә аңа кадәр, 19 нчы октябрьдә үзебезнең мәктәптә узган ярышларның зона турында Кайбыч һәм Ульянково мәктәпләре командаларын җиңеп 1 нче урын яулаган иделәр. Укучыларыбызны чын күңелдән котлыйбыз һәм яңа ярышларда уңышлар телибез!

Бүген 1 нче сыйныф җитәкчесе Мөхетдинова Алсу Назым кызы, әти- әниләр өчен "ачык ишекләр" көне үткәрде. Укучыларның әниләре мәктәпкә килеп, әлифба һәм азбука дәресләрендә балаларының дәрестә үз-үзләрен тотуларын һәм дәрестә катнашуларын күзәттеләр, соңыннан укытучының киңәшләрен алдылар.