25 нче ноябрьдә Казанда узган “Күркәм гаилә” республика күләмендә уздырылган  бәйгедә  Гран-прига мәктәбебез директоры  Ильмас Хәмидуллин һәм аның гаиләсе лаек булды. Ильмас Илдарович гаиләсе — мөгаллимнәр гаиләсе, Алсу ханым Олы Кайбыч урта мәктәбендә татар теле һәм әдәбияты укытучысы булып эшли. Ислам кануннары буенча яшәүче бу күркәм гаилә алмадай 3 кыз тәрбияләп үстерә. 

Күркәм гаиләләрне Татарстанның халык шагыйре Роберт Миңнуллин,  “Татмедиа” АҖ генераль директоры Фәрит Шаһиәхмәтов, «Гаилә һәм мәктәп» журналы баш мөхәррире Гөлүсә Закирова, ТР Халыклар дуслыгы йорты директоры Ирек Шәрипов, вотерполо буенча ике тапкыр Олимпия чемпионы, “Синтез-Академия” командасы тренеры һәм “Гаилә һәм мәктәп” журналы дусты Ирек Зиннуров, ТР Мәгарифне үстерү институты белгече Рузилә Фәттахова, БТК каршындагы «Татар гаиләсе» фонды җитәкчесе Миләүшә Гайфуллина,  “Салават күпере” журналы мөхәррире Зилә Хөснияр, «Туган авылым» мәчете имам-хатыйбы Илнар хәзрәт Зиннәтуллин, КФУның социаль фәлсәфә фәннәре һәм массакүләм коммуникация институтының татар журналистикасы кафедрасы мөдире профессор Васил Гарифуллин һ.б. тәбрикләде. Әлеге күркәм гаиләне җиңүләре белән чын күңелдән котлыйбыз. Авыр,ләкин мактаулы хезмәтләрендә зур иҗади уңышлар,гаилә иминлеге,тигезлек телибез.