1 июнь, гадәттәгечә, һәр елны Халыкара балаларны яклау көне буларак билгеләнеп үтелә. Безнең балалар өчен – ул һәрвакыт иң күркәм һәм иң көтеп алынган бәйрәм, чөнки мәктәпләрдә укулар тәмамланган һәм каникуллар башланган вакыт бу. Һәм һәрвакыт шулай булып калсын да! Ә без, өлкәннәр өчен, бу көн – балалар мәнфәгатьләрен тагын да яхшырак тәэмин итү өчен барысын да эшлибезме икәнен тагын бер кат дәүләтнең, җәмгыятьнең һәм безнең һәрберебезнең исенә төшерү көне ул. Халыкара балаларны яклау көненә багышлап үткәрелгән бәйрәмдә "Укучының мәдәни көндәлеге" проектының иң активлары булып танылган балалар билгеләп үтелде. Мәгариф бүлеге җитәкчесе Илмас Илдар улы Хәмидуллин иң актив укучыларны бүләкләп үтте, алар арасында укучыбыз Ләбибә Баһавиева да бүләкләнде. Алга таба да уңышлар телибез аңа!