7 декабрь көнне Галия Кайбицкая исемендәге музейда инвалидлар ункөнлеге кысаларында очрашу кичәсе үтте. Очрашуга Олы Кайбыч урта мәктәбенең татар теле һәм әдәбият дәресе укытучысы Булатова Гөлия Алкиновна җитәкчелегендәге 6 А һәм 9 Б  сыйныфы укучылары 1 нче группа инвалид Сәләхиева Вәсилә апа белән очрашты.  Күзенә 9 тапкыр операция ясатса да, аның күзләре менә инде 6 ел якты дөньяны күрүдән мәхрүм. Бик күп сынаулар күргән бу ханым сынаулар алдында сынмаган, сыгылмаган. Киресенчә, ул дөньяны өзелеп ярата.  Чыгышы белән Чувашия Республикасының Яльчик районы Байтирәк авылында туып – үскән кыз,  1963 нче елны Казан медицина училещасын тәмамлагач, Кайбыч больницасына фельдшер – лаборант булып эшкә билгеләнә. Вәсилә апа үз эшенә бик җаваплы карый, кешегә яшәү чаткысы бүләк итә.  Кичәбезнең кунагы гомерен балаларга белем бирүгә багышлаган Ләбибә апа  Шәмсетдинова үзенең мәгънәле, кызыклы сораулары белән очрашуны җанландырып барды, балаларга янәшәбездә булган, язмыш тарафыннан кимсетелгәннәргә ярдәм кулын сузарга, аларга карата игътибарлы булырга өндәде. Балалар үз чиратында Вәсилә апаның сөйләвен зур кызыксыну белән тыңладылар, үзләрен кызыксындырган сорауларга җавап алдылар. Бу очрашу һәркемгә  уйланырга мөмкинлек тудырды, чөнки иртәгә сине нәрсә көткәнен беркем дә белми.