Бөек Петр нигез салган кала... Һәр җирдә, һәр юлда аның эзе, аның рухы... Илһам эзләүчеләр, иҗатчылар, гашыйклар, ирекле кешеләр шәһәре... Бер күрүдән әсир итә, яраттыра, шаккатыра торган кала... Адым саен илһам чыганагы... Салкын вакытта да, җылылыгын югалтмыйча, шул җылылыкны шәһәрдәге һәркемгә өләшергә әзер торган Санкт - Петербург... Кем уйлаган бит шул шәһәргә сәяхәт кылырмын дип? Хыял, матур төш кенә булып тоелган Петербург өнгә әверелде дә куйды! Хисләрем суынганчы гүзәл Санкт – Петербург каласыннан алып кайткан кичерешләрем белән уртаклашыйм әле.

Көзге каникулларны кайда үткәрергә, дип баш ваткан чакта, Санкт – Петербургка сәяхәт кылырга дигән фикер туды укытучыбызда. Былтыргы 10 нчы сыйныф укучылары барып кайткан шәһәргә безнең дә бару мөмкинлеге туды.  Әти-әниләр, укытучылар ярдәме белән хыялыбыз тормышка ашты: билетлар алынды, киемнәр әзер, фотоаппаратлар кулда– без юлга кузгалдык. Сөйләшеп, көлешеп, уйнап барганда озын юл да кыска тоела икән бит ул. Әле дусларың белән булгач бигрәк тә! Петербургка якынайган саен йөрәкләр ешрак типте. Ә килеп җиткәч... сулаудан туктадык: шәһәр үзенә алып кереп китте, гашыйк итте, йотты!

Озакламый  без гаҗәеп матур шәһәрнең урамнары буйлап сәяхәткә кузгалдык. 4 көн дәвамында без  күп урыннар белән таныштык, тарихка күз салдык. Кышкы сарай, Петропавловск крепосте, Трубецкой бостионы, Казан соборы, Невский проспекты, Исаакий соборы, Петергофф, Кронштадт, төнге шәһәр... Тыгыз һәм мавыктыргыч экскурссияләр гомерлеккә истә калырлык булды. Һәр адымыбызны мәңгеләштереп калдырыр өчен фотога төшердек, күбрәк белергә омтылып экскурсовод –гидны тыңладык, сораулар бирдек. Шәһәр дә безне яратты булса кирәк: яңгырлык, кырыс һава торышы белән куркытмады, киресенчә, кояш бүләк итте. Әллә без Кайбычтан җылы һава алып килдекме икән?