Барлык мәктәпләрдә укучылар көзге каникулларга таралыштылар. Ләкин мәктәпкә бармасак та, без вакытыбызны файдалы үткәрергә тырышабыз. 3 ноябрь көнне 5 а сыйныфы укучылары бергәләшеп әти-әниләребез эшләгән оешмаларга экскурсия оетырдык. Сәяхәтебезне Саклык банкыннан башладык. Анда сыйныфташыбыз Фәнил Төхфәтуллиның әнисе Зөлфия апа инде 20 елдан артык банк хезмәткәре булып эшли. Эксурсоводыбыз да банк җитәкчесе Канашов Юрий Геннадьевич иде. Ул безне кабинетына чакырып, банкның эшләү тәртибе белән таныштырды, кайда, ничек укырга кирәклеген сөйләде. Без дә кызыксындырган сорауларыбызга җавап таптык. Аннан электр челтәре оешмасына юл тоттык, җирле үзидарәгә кереп Инсаф Низаметдиновның әнисе Гүзәл апа белән әңгәмә корып чыктык. Юл өстендә генә булганга, “Салават күпере” спорт комплексы да читтә калмады. Тренажер залында көчләребезне ныгыттык, бассейнда коендык. Көнебез бик күңелле үтте.