Каникул - балалар өчен иң көтеп алынган вакыттыр ул. Язгы каникул бигрәк тә көттереп килә, чөнки 3 нче чирек иң озын чирек булып санала. Шул рәхәт мизгелләрне күңелле дә, файдалы итеп үткәрү өчен Кайбычыбызда мөмкинлекләр тагын да күбәйде. “Салават күпере” спорт комплексы һәр көнне балалар тавышыннан шау-гөр килеп торды. Безнең 11 Б сыйныфы да имтиханнарга бик ныгытып әзерләнү белән бергә ял турында да онытмады. Сыйныф җитәкчебез Алсу Фәритовна белән берлектә егетләр һәм кызлар 26 март көнне “Салават күпере”ндә сәламәтлегебезне ныгытып кайттык. Ике команда бүленеп волейбол ярышлары дисеңме, мини футбол дисеңме, теләгән кешеләр өчен суда ярышлар дисеңме – барысы да булды. Алдагы имтиханнарны уңышлы биреп чыгу өчен безгә бик күп көч кирәк булачак бит әле, шуңа күрә спортны да онытырга ярамый.