Мәктәп базасында бүген узган семинар районның татар теле һәм әдәбияты укытучыларын җыйды. Семинарның темасы: "Югары сыйныф укучыларын имтиханнарга әзерләү системасы". Методик берләшмә җитәкчесе Хәмидуллина А. Ф. шул тема буенча үзенең эш системасы белән җентекләп таныштырды. Ачык дәрес тә 9 сыйныфта Бердәм дәүләт тестларына әзерлек кысаларында үтте. Укытучы уңышлы темага мөрәҗәгать итеп, балаларга кызыклы һәм аңлаешлы итеп җиткерүгә иреште.

     7 сыйныфта Сәнгатуллина Л.Х.  әдәбияттан  тирән мәгънәле "Матурлык" әсәрен йомгаклау  дәресен күрсәтеп кенә калмады, бүгенге тормыш, проблемалар белән бәйләп, зур тәрбияви әһәмият бирде. Максатларына ирешергә укытучыга "Сингапур технологияләре" ярдәм итте.

    Ә 6 б сыйныфы укучылары Карипова И.И. җитәкчелегендә татар телендә спектакль күрсәттеләр. Ф Яруллин әсәре буеча куелган бу спектакль кечкенә "артистларның" үз рольләрен җиренә җиткереп башкарулары белән истә калды.

  Түгәрәк өстәл артында сөйләшүдә укытучылар  29 апрельдә узачак бердәм дәүләт тестлары буенча фикер алыштылар һәм үз тәҗрибәләре белән уртаклаштылар.