1 нче мартта Казанның 4нче гимназия-интернатында республикакүләм «Асылташ» кызлар бәйгесе финалы узды һәм аның җиңүчеләре билгеле булды.Безнең мәктәптән 10 нчы Б сыйныфы укучысы Рәхмәтуллина Зилә катнашты.

Бәйгене Татарстан Мәгариф һәм фән министрлыгы, Казан шәһәре мәгариф идарәсе ярдәме белән Казанның 4нче гимназия-интернаты үткәрә. «Асылташ»та 14-18 яшьлек кызлар катнаша.

«Асылташ» бәйгесе күңел ачу өчен түгел, ә татар халкының йөзек кашы, намусы, киләчәге булырдай кызларны барлау өчен уздырыла. Аның максаты - кызларда гыйлемлелек, изгелек, гаделлек, әдәплелек кебек рухи-әхлакый сыйфатлар тәрбияләү, милли узаң уяту.

Финалга килеп җиткән кызлар, «Тормышымның милли бизәкләре» темасына эссе язып һәм үзләренең уңышларын яктырткан презентация ясап, читтән торып уздырылган этапта сайланып алынды. Финалда исә аларга 5 биремдә көч сынашырга туры килде.

«Танышу» биремендә финалистлар 5-6 җөмлә белән үзләре турында сөйләде. «Нәселебезнең һөнәре» дип аталган этапта кызлар презентация ярдәмендә нәселдән нәселгә күчеп килгән һөнәрләре белән таныштырды.

«Интеллектуаль конкурс» дип аталган биремдә алар тарих, әдәбият, сәнгать өлкәләренә кагылган сорауларга җавап биреп, үзләренең белем, фикерләү дәрәҗәсен күрсәтте. «Әдәби сүз» биремендә кызлар билетта чыккан афоризмның мәгънәсен аңлаттылар.

«Алтын җөй» дип аталган соңгы биремдә Зилә милли бизәкләрне кулланып, түбәтәй эшләү үзенчәлекләре белән таныштырды һәм аны видео ярдәмендә үзе эшләгәнен дәлилләде, үз кулы белән эшләгән калфак, түбәтәйләр белән таныштырды.

Зилә, бәйге нәтиҗәләре буенча, 2 нче урынга лаек булды, Диплом һәм кыйммәтле бүләк белән бүләкләнде.  Уңышлары дәвамлы булсын иде.

Җитәкчесе Булатова Г. А.