18-25 февраль көннәре арасында мәктәбебездә татар теле һәм әдәбияты атналыгы үткәрелде. Шул уңайдан төрле чаралар, әдәби-музыкаль кичәләр, ачык дәресләр күрсәтелде.  Мәктәпнең татар теле һәм әдәбияты укытучыларының методик берләшмәсе җитәкчесе Сөнгатуллина Л. Х., беренче квалификацион категорияле укытучылар  Хәмидуллина А.Ф. һәм Баһавиева Л.Р. атналыкны тирән эчтәлекле, нәтиҗәле һәм файдалы итеп уздыру өчен күп көч куйдылар, һәм тырышлык бушка китмәде. Беренчедән, ачык дәресләрдә кызыклы темалар каралды: 11 сыйныф укучылары Алсу Фәритовна белән "Эргонимнар" серенә төшенделәр, эзләнү эшләре белән шөгыльләнделәр. 10 сыйныфта Лютсия Хәйрулловна "Әдәбият һәм Коръән" темасын ачу белән бергә укучыларда әхлакълылык сыйфатлары тәрбияләүгә зур игътибар бирде. Ләйсән Рәшитовна 5 б сыйныфында А. Алишның "Сертотмас үрдәк" әкиятендә сурәтләнгән образларны  тормыштагы мисаллар белән бәйләп, әсәрнең сурәтләү чараларын төшендерде.

 Класстан тыш чараларда да балалар теләп катнашты: М.Җәлил әсәрләрен яратучылар шигырь бәйгесендә көч сынашты. Атналык барышында 2 спектакльдән өзекләр куелды 6 а сыйныфы укучылары Г.Камалның "Беренче театр", ә 10 б - Г.Рәхимнең "А ля-шер"ын уйнады.8 нче сыйныф укучылары арасындагы КВН да күпләргә ошады, ә иң әһәмиятлесе - КВНның  җиңүчеләре билгеләнгәч тә, беркем таралырга ашыкмады:  катнашучылар да, тамашачылар да бөтен зал белән бергә  басып "Туган тел" җырын башкардылар.

  Китапханәдә  21 февраль- Халыкара туган телләр көне уңаеннан оештырылган күргәзмә  Ф.Яруллин сүзләре астында күрсәтелде: "Тел - халык күңеленең кыңгыравы".  Шулай ук мәктәп радиосы дулкыннарында алыштыргысыз ди-джейлар Радик һәм Алсу   "И минем туган телем" дип аталган искиткеч кызыклы тапшыру  яңгыраттылар. Билгеле инде, аларга остазлары булышты.  Нәкъ шул көнне Казанда ике укучыбыз инде дүртенче ел  К(П)ФУ базасында уздырыла торган  дәрәҗәле фәнни-гамәли конференциядә катнашып, Мактау грамоталары алып кайттылар.

  Укытучыларыбызның да, укучыларыбызның да уңышлары шактый, ә потенциал бай. Атналык безгә шуны исбатлады.