Һәр мәктәпнең үз тормышы, үз мәшәкате. Укытучылар, мәктәп җитәкчеләре, укучылар бергәләп бер казанда кайныйлар. Кешеләр төрле булган кебек, укучылар да төрле. Безнең Кайбыч урта гомуми белем бирү мәктәбендә төрле авыл балалары белем ала. Бүгенге сүзем шушы мәктәптә 1 нче сыйныфтан 10 нчы сыйныфка кадәр укып килүче Баһавиева Язилә Илгиз кызы турында. Тәртибенә килгәндә бик сабыр, тыйнак, мәрхәмәтле һәм изге күңелле бу кыз турында бик күпне язып булыр иде. Укуда да ул бик тырыш, белемле. 1 нче сыйныфтан 10 нчы сыйныфка кадәр гел “5” билгеләренә генә өлгереп килде. Мәктәп кысаларында гына ятмый ул.Район, республика күләмендә дә балкый. 8 нчы сыйныфтан башлап, КФУда татар лингвокультурологиясе буенча үтүче фәнни-гамәли тикшеренү эшләрендә катнашып, эшләре җыентыкта басылып килә. 2 ел рәттән Каюм Насыйри исемендәге фәнни-гамәли конференциядә катнаша. “Йолдызлык “фестивалендә “конферансье” номинациясендә район турында катнашып килде. Фән олимпиадаларында да катнаша: рус теле, татар теле,татар әдәбияты, химия, биология, математика фәннәреннән район күләмендә 1 нче урыннарны яуласа, республика олимпиадасында татар теленнән 2 нче ел рәттән призер булды. Шулай ук 2 ел рәттән онлайн да үтүче КФУ олимпиадасында ( татар теленнән) катнашып, 2 нче турга үтеп,  2 нче урын алды,  3 нче мартта быел да барачак. КНИТУда үтүче математика олимпиадасында 1 нче урын, химия һәм биологиядән 3 нче урыннар. Әле “илһамлы каләм”конкурсына да эшләр әзерләп ята.Горурланмыйча булмыймыни мондый укучыбыз белән? Горурланабыз, бик горурланабыз һәм алга таба да шундый зур уңышларга ирешүен,  сәламәт һәм акыллы булуын теләп калабыз. Уңышлар сиңа, Язилә!