Бүген Казан шәһәрендә 1 ел барган төзекләндерү эшләреннән соң, цирк бинасы үзенең ишекләрен янәдән ачты. Анда Россия Дәүләт циркы үзенең "Фиеста" дип аталган тамашасын тәкъдим итте. Бу тамашаны күрү безгә, ягъни Кайбыч районының күпбалалалы гаиләләрендә тәрбияләнүче егермегә якын балага да насыйп булды. Тантанага президентыбыз Миңнеханов Рөстәм Нургалиевич та килгән иде, аны якыннан күрү бәхетенә ирештек. Цирк бинасы бик матурланган, яңарган, рәхәтләнеп фотога төштек, фойеда тәмле ризыклар белән чәй эчтек, ә иң кызыклысы, әлбәттә, тамаша булды. Анда оста гимнастларга, канатта йөрүчеләргә, акробатлар, жонглерлар, атта йөрүчеләргә бик рәхәтләнеп кул чаптык, аюлар, маймыллар, казлар, этләрнең һөнәрләренә шаккаттык. Клоуннарның кызыклы номерлары балалаларга гына түгел, әниләребезгә дә бик ошады, безнең белән бергә алар да рәхәтләнеп ял иттеләр. Аннары "Корстон" күңел ачу үзәгендә безне тәмле төшке аш белән сыйладылар, анда бик матур залларга өстәлләр әзерләнгән иде, "Корстон"ның матурлыгына соклана-соклана, залларында йөрдек. Арып-талып булса да, күтәренке күңел белән Кайбычыбызга кич белән генә кайтып кердек. Безгә шундый зур бүләк әзерләгән җитәкчеләребез - президентыбыз Рөстәм Нургалиевичка, район башлыгыбыз Альберт Илгизәровичка, социаль яклау бүлеге хезмәткәрләренә барыбыз исеменнән дә зур РӘХМӘТ!
7 нче а сыйныфы укучысы Хәмидуллина Зөһрә