Толерантлык. Әлеге төшенчә бар кешегә дә таныш булмаска мөмкин. Тик аның мәгънәсе кешелек җәмгыятенең үсеше өчен бик әһәмиятле булып тора. Заманча мәдәниятле кеше -ул укымышлы гына түгел, ә башкалар тарафыннан хөрмәткә ия булган һәм үз-үзен ихтирам иткән кеше дә. Шул турыда иркенләп сөйләшү максатыннан, 7 а сыйныфы укучылары авылыбыз мөхтәсибе Гыйниятуллин Дамир хәзрәтне сыйныф сәгатенә чакырды. Укучылар бергәләп толерантлык төшенчәсен аңлатучы сыйфатларны таптылар, юнәлешләрен билгеләделәр. Социаль видеороликлар карап, нәтиҗә ясадылар. Җир йөзендә нинди генә милләттән, социаль катлаудан, диннән булуыбызга карамастан, без барыбыз да бертигез һәм хөрмәткә лаек, чөнки без КЕШЕ, димәк кешелек сыйфатларын югалтмаска тиешбез. Ислам динебез дә нәкъ шушы фикерне алга сөрә. Дамир хәзрәт 6 гасырда пәйгамбәребез Мөхәммәт с.г.в. тарафыннан төзелгән боерык белән таныштырып үтте. Анда да шушы фикерләрне күрергә мөмкин. Без бик күп мәгълүмат алып, үзебез өчен ныклы нәтиҗәләр ясап таралыштык.