Укучыларда әти-әни, әби-бабай, туганнарга карата олы ихтирам,хөрмәт, мәхәббәт хисләре тәрбияләү, аларның кадерен белү теләге уяту максатыннан Олы Кайбыч мәчетендә 1А ,1Б сыйныф укучылары Дамир хәзрәт белән очрашты.
Гаиләне дәүләтнең нигезе диләр. Гаилә нык булса, дәүләт тә нык була. Гаиләдә һәркем бер – берсен хөрмәт итеп, ярдәмләшеп яшәргә тиеш. Гаилә ул - әти-әни, әби-бабай, абый-апа, эне-сеңел, туганнар. 
Ананың балага тәрбия-тәэсир кодрәте гаилә яки нәсел-нәсәбе белән генә чикләнми. Милләтнең әхлагы ана тезләрендә, ана итәгендә калыплана. Менә ни өчен Ана хакын хаклауны халык Алла хакын хаклауга тиңләгән!
Ана хакын олылап әйтелгән халкыбыз өйрәтүләрен хәтердән чыгармыйк.
Әтиләребез дә бик газиз безгә. Чын ирләр - асыл ирләр - ил терәге дә, гаиләнең төп таянычы да. «Ата хакы - Алла хакы» дию һәммәсен аңлатып бирә шикелле.
Безнең әле тагын яшьләрнең игьтибар-илтифатына аеруча мохтаҗ кешеләребез бар. Алар - әбиләребез һәм бабаларыбыз. Болар - хәзинә, киңәшчеләрнең беренчеләре, ата-баба йоласын саклап килүчеләр. Балалар, кечкенәдән әти-әниләрне, өлкәннәрне хөрмәтләп, олылап, санлап үссәгез, тәүфыйкълы, димәк, бәхетле булырсыз. «Бәхет башы - тәүфыйкъ», дигән бит борынгылар. Сез дә бәхетле – тәүфыйкълы, озын гомерле булыгыз.
Гиниятуллина Г.А.