Алабуга муниципаль районы «Юлдаш» Балалар – яшүсмерләрнең туризм һәм экскурсияләр үзәге” өстәмә белем бирү учреждениесе 2016 – 2017 нче уку елына бик кызыклы һәм мавыктыргыч инновацион проект – “Туган ягым – Татарстан” экспедициясен оештырды.
1 нче гимназиянең 11 нче сыйныф укучысы Шәфигуллин Айрат бу проектта зур кызыксыну һәм җиңүгә омтылыш белән катнашты. Ул бронза, көмеш һәм алтын дәрәҗәләрнең таләпләрен үтәде һәм җиңеп чыкты! Казан шәһәрендә Г.Камал исемендәге Татар дәүләт академия театры янында Шүрәле һәм Былтыр белән күреште, К.Тинчурин исемендәге драма һәм комедия театрында “Гашыйклар тавы” спектаклен карады, Салих Сәйдәшев музеенда, Казан Кремлендә, Милли музейда булды. Зөя (Свияжск) утрау – шәһәрен буеннан буена җәяү йөреп чыгып, бөтен музейларын, һәйкәлләрен, истәлекле урыннарын күреп кайтты. Ә үзебезнең Алабугада Айрат кермәгән музей, ул янына барып, фотога төшмәгән берәр һәйкәл калдымы икән? Тырышлык бушка китмәде. Айрат грамота, диплом, значоклар һәм 3000лек сертификат белән бүләкләнде.
Афәрин, Айрат! Алда да уңышлар сиңа!