Бүгеннән башлап, атна дәвамында, республиканың барлык мәктәпләрендә Дәүләт Советы, Татарстаннан сайланган РФ ФҖ Дәүләт Думасы, җирле үзидарәләрнең вәкиллекле органнары депутатлары катнашында парламент дәресләре уздырылачак. Парламентарийлар сайлау округларындагы гомуми белем бирү учреждениеләрендә булып, укучылар белән аралашып, аларга Дәүләт Советы эше, закон чыгару үзенчәлекләре, законнарның безнең тормыштагы роле турында сөйләячәк. Татарстанда парламент дәресе Дәүләт Советы башлангычы белән Татарстан Мәгариф һәм фән министрлыгы белән республика Мәгарифне үстерү институты катнашында беренче тапкыр 2009 елда узган. Шуннан башлап, проект ел саен үткәрелә башлаган. Быелның 8-13 февралендә парламент дәресе сигезенче тапкыр оештырыла. Сигез ел дәвамында парламент дәресләре төрле темаларга багышланган: "Законнар туган җирдә", "Граждан һәм сайлаулар", "Мин - бала! Мин - граждан!", "Кеше һәм гражданның конституцион хокуклары һәм бурычлары", "РФ һәм ТРның Дәүләт символлары. РФ Конституциясенең 20 еллыгы" һәм башкалар. Парламент дәресе - 2016ның темасы - "Граждан. Җәмгыять. Дәүләт".